നെടുമ്പാശ്ശേരി: സംസ്ഥാന ഹജ്ജ് കമ്മിറ്റിവഴി ഹജ്ജ് കര്‍മം നിര്‍വഹിക്കുന്ന തീര്‍ഥാടകര്‍ക്കുള്ള സംസം വെള്ളം നെടുമ്പാശ്ശേരിയില്‍ എത്തി. 8,500 പേര്‍ക്ക് വിതരണം ചെയ്യാനുള്ള 42,500 ലിറ്റര്‍ സംസമാണ് ഇന്നലെ നെടുമ്പാശ്ശേരിയില്‍ എത്തിച്ചത്.

തീര്‍ഥാടകരെ ജിദ്ദയിലേക്ക് കൊണ്ടുപോകുന്നതിന് ഇന്നലെ ഉച്ചയ്ക്ക് 11ന് നെടുമ്പാശ്ശേരിയിലെത്തിയ സഊദി എയര്‍ലൈന്‍സ് വിമാനത്തില്‍ 4,500 കാനുകളും രാത്രി ഏഴിന് എത്തിയ വിമാനത്തില്‍ 4,000 കാനുകളുമാണ് കൊണ്ടുവന്നത്. കേരളം, ലക്ഷദ്വീപ്, മാഹി എന്നിവിടങ്ങളില്‍ നിന്നുള്ള 11,000 ത്തോളം തീര്‍ഥാടകര്‍ക്കുള്ള സംസം വെള്ളമാണ് സഊദി എയര്‍ലൈന്‍സ് എത്തിക്കേണ്ടത്. ബാക്കിയുള്ളത് ഇന്ന് കൊണ്ടുവരും. തീര്‍ഥാടകരുടെ മടക്കയാത്രയില്‍ സംസം വെള്ളം കൊണ്ടുവരാനുള്ള പ്രായോഗിക ബുദ്ധിമുട്ടുകള്‍ കണക്കിലെടുത്താണ് സംസം നേരത്തേ എത്തിക്കുന്നത്. തീര്‍ഥാടകര്‍ മടങ്ങിയെത്തുമ്പോള്‍ അഞ്ച് ലിറ്റര്‍ വെള്ളം വീതമാണ് ഓരോരുത്തര്‍ക്കും വിതരണം ചെയ്യുക.

തീര്‍ഥാടകര്‍ക്ക് സ്വന്തം നിലയില്‍ സംസം വെള്ളം കൊണ്ടുവരാന്‍ അനുമതി ഉണ്ടാകില്ല. ഇന്നലെ കൊണ്ടുവന്ന സംസം വെള്ളം ഹജ്ജ് ക്യാംപ് പ്രവര്‍ത്തിക്കുന്ന എയര്‍ക്രാഫ്റ്റ് മെയിന്റനന്‍സ് ഹാങ്കറില്‍ പ്രത്യേകമായി സൂക്ഷിച്ചിരിക്കുകയാണ്. അഞ്ച് ലിറ്റര്‍ വീതമുള്ള കാനുകള്‍ പ്രത്യേകം കവറില്‍ പായ്ക്ക് ചെയ്താണ് സംസം എത്തിച്ചിരിക്കുന്നത്.