കൊച്ചി: നിയമസഭാ കൈയ്യാങ്കളി കേസില്‍ മന്ത്രി വി.ശിവന്‍കുട്ടിയടക്കം ആറു പ്രതികളും സെപ്തംബര്‍ 14ന് ഹാജരാകണമെന്ന് കോടതി. കുറ്റപത്രം വായിച്ചു കേള്‍ക്കാനാണ് പ്രതികള്‍ ഹാജരാകേണ്ടത്. വിചാരണ നടപടികളുടെ ആദ്യ ഘട്ടമാണിത്. പ്രതികള്‍ക്ക് ഹാജരാകാനുള്ള അവസാന അവസരമാണിതെന്നും തിരുവനന്തപുരം സി.ജെ.എം കോടതി മുന്നറിയിപ്പ് നല്‍കി.

വി.ശിവന്‍കുട്ടി, മുന്‍ മന്ത്രിമാരായ ഇ.പി.ജയരാജന്‍, കെ.ടി.ജലീല്‍, മുന്‍ എംഎല്‍എമാരായ കെ.അജിത്, കെ.കുഞ്ഞഹമ്മദ്, സി.കെ.സദാശിവന്‍ എന്നിവരാണു കേസിലെ പ്രതികള്‍. 2015 മാര്‍ച്ച് 13ന് അന്നത്തെ ധനമന്ത്രി കെ.എം.മാണി ബജറ്റ് അവതരിപ്പിക്കുന്നതു തടയാന്‍ ആക്രമണം നടത്തി 2.20 ലക്ഷം രൂപയുടെ നഷ്ടം വരുത്തി എന്നാണ് പൊലീസ് കേസ്.

2015ലെ ബജറ്റ് അവതരണ വേളയില്‍ സ്പീക്കറുടെ വേദി തകര്‍ത്തു പ്രതിപക്ഷാംഗങ്ങള്‍ നിയമസഭയില്‍ നടത്തിയ കയ്യാങ്കളിയുടെ അലയൊലികള്‍ രാഷ്ട്രീയ കേരളത്തെ ഇന്നും പിടിച്ചുലയ്ക്കുന്ന ഒന്നാണ്. സഭയില്‍ പ്രതിഷേധ പ്രകടനം മാത്രമാണു നടത്തിയതെന്നാണു പ്രതികളുടെ ന്യായീകരണം.