പുലാപ്പറ്റ: പുലാപ്പറ്റ കേന്ദ്രീകരിച്ചു  ഗ്രാമപഞ്ചായത് രൂപീകരിക്കണമെന്ന ആവശ്യം കാലങ്ങളായിട്ടും നടപ്പിലായില്ല. ഇപ്പോള്‍ കമ്പഴിപ്പുറം പഞ്ചായത്തിന്റെ പരിധിയിലാണ് പുലാപ്പറ്റ സ്ഥിതി സ്ഥിതി ചെയ്യുന്നത്.
കോണിക്കഴിയില്‍ നിന്നും പഞ്ചായത്ത് ആസ്ഥാനത്തേക്ക് എത്തിച്ചേരണമെങ്കില്‍ 10 കിലോമീറ്ററിലധികം ദൂരം യാത്ര ചെയ്യണം. പഞ്ചായത്ത് പ്രാഥമിക ആരോഗ്യ കേന്ദരത്തിലേക്കെത്താന്‍ 12 കിലോമീറ്ററും. അത്യാവശ്യ കാര്യങ്ങള്‍ക്ക് തൊട്ടടുത്ത പഞ്ചായത്തിലെ ആരോഗ്യ കേന്ദ്രങ്ങളെ ആശ്രയിക്കണം. എന്നാല്‍  ഓഫിസ് ആവശ്യങ്ങള്‍ക്ക് അത് സാധ്യമല്ലാത്തതിനാല്‍ പുതിയ പഞ്ചായത്ത് എന്ന ആവശ്യം ശക്തമാണ്. കടമ്പഴിപ്പുറം പഞ്ചായത്തിലെ 18 ല്‍ ഒന്‍പത് വാര്‍ഡുകളും സ്ഥിതി ചെയ്യുന്നത് പുലാപ്പറ്റയോട് ചേര്‍ന്നാണ്.
അതോടൊപ്പം പുലാപ്പറ്റയോട് ചേര്‍ന്ന് നില്‍ക്കുന്ന കോങ്ങാട് പഞ്ചായത്തിലെ തൃപ്പലമുണ്ടയും അട്ടക്കാടുംഉള്‍കൊള്ളുന്ന വാര്‍ഡുകളും ശ്രീകൃഷ്ണപുരം പഞ്ചായത്തിലെ പുലാപ്പറ്റയോട് ഒട്ടി നില്‍ക്കുന്ന കുളക്കാട്ടുകുര്‍ശ്ശി ഭാഗങ്ങളും കൂടിയാകുമ്പോള്‍ വിശാലമായ ഒരു പഞ്ചായത്തിന്റെ സൗകര്യമൊരുങ്ങും
സുല്‍ത്താന്‍ റോഡ് കടന്നു പോകുന്നത് പുലാപ്പറ്റയിലൂടെയാണ്. ദേശീയ-സംസ്ഥാന പാതകള്‍ സമന്വയിപ്പിക്കുന്നതിന് പുലാപ്പറ്റ മുഖ്യമായ പങ്കു വഹിക്കുന്നു. എന്നിട്ടും അനുയോജ്യമായ ഒരു റോഡു പോലുമില്ലിവിടെ.
മിക്ക ഭാഗങ്ങളിലും മുപ്പതും നാല്‍പ്പതും വര്‍ഷങ്ങള്‍ക്ക് മുന്‍പ് പണിത പാതകള്‍ ഇന്നും അതേപടി നിലനില്‍ക്കുന്നു. വല്ലപ്പോഴും അറ്റകുറ്റപ്പണികള്‍ നടത്തിയിട്ടുണ്ടെന്ന് മാത്രം.