അഹമദാബാദ്: പ്രമുഖ ഗുജറാത്തി പത്രമായ ജയ്ഹിന്ദിന്റെ ജുനഗഡ് ബ്യൂറോ ചീഫ് കിഷോര്‍ ദാവെ (53)യെ കൊലപ്പെടുത്തിയ കേസില്‍ മൂന്നുപേര്‍ അറസ്റ്റിലായി. പത്രമോഫിസില്‍ വാര്‍ത്ത തയാറാക്കുന്നതിനിടെയാണ് കിഷോര്‍ ദാവെ കുത്തേറ്റു മരിച്ചത്.
ഫിറോസ് ആല, സഞ്ജയ് രാത്തോഡ്, ആരിഫ് സഈദ് എന്നിവരാണ് അറസ്റ്റിലായത്. ഇവര്‍ കുറ്റം സമ്മതിച്ചതായി പൊലിസ് ഉദ്യോഗസ്ഥനായ നിലേഷ് ജജാദിയ പറഞ്ഞു. സ്ത്രീ പീഡനവുമായി ബന്ധപ്പെട്ടു വാര്‍ത്ത നല്‍കിയതു സംബന്ധിച്ചു ബി.ജെ.പി മുന്‍മന്ത്രിയുടെ മകനില്‍നിന്നു ദാവെയ്ക്കു ഭീഷണിയുണ്ടായിരുന്നതായി ബന്ധുക്കള്‍ ആരോപിച്ചിരുന്നു.
എന്നാല്‍ അറസ്റ്റിലായ പ്രതികളില്‍ ഒരാളായ ഫിറോസ് കിഷോര്‍ ദാവെയുമായി ബിസിനസ് പങ്കാളിത്തമുള്ളയാളാണെന്നാണ് പൊലിസ് പറയുന്നത്. ഇവര്‍ തമ്മിലുള്ള തര്‍ക്കം കൊലപാതകത്തില്‍ കലാശിച്ചെന്നാണ് പൊലിസ് റിപ്പോര്‍ട്ട്.