കോഴിക്കോട് • പ്രൊവിഡൻസ് ഗേൾസ് ഹയർ സെക്കൻഡറി സ്‌കൂളിൽ വീണ്ടും വിദ്യാർഥിനികൾക്ക് ശിരോവസ്ത്ര വിലക്ക്.
പ്ലസ് വൺ പ്രവേശനത്തിനെത്തിയ വിദ്യാർഥിനിയോടും രക്ഷിതാവിനോടുമാണ് ശിരോവസ്ത്രം അനുവദിക്കില്ലെന്ന് പ്രിൻസിപ്പൽ ഡോ. സിസ്റ്റർ സിൽവി ആന്റണി വ്യക്തമാക്കിയത്. ഷാൾ അനുവദിക്കില്ലെന്നാണ് പ്രിൻസിപ്പൽ ആദ്യം പറഞ്ഞത്.
തട്ടമിടാൻ പാടില്ലെന്നാണോ ഉദ്ദേശിച്ചതെന്ന ചോദ്യത്തിന് അതു നിങ്ങൾക്ക് സൗകര്യം പോലെ കണക്കുകൂട്ടാമെന്നായിരുന്നു മറുപടി. ഇവിടെ ഇങ്ങനെയാണ്, സൗകര്യമുണ്ടെങ്കിൽ കുട്ടിയെ ചേർത്താൽ മതിയെന്നും പ്രിൻസിപ്പൽ പറഞ്ഞതായി രക്ഷിതാവ് പറഞ്ഞു. ചില കുട്ടികൾക്ക് മാത്രമായി യൂനിഫോമിൽ മാറ്റം വരുത്താനാകില്ലെന്നും യൂനിഫോമിൽ ശിരോവസ്ത്രമില്ലെന്നും പ്രിൻസിപ്പൽ വ്യക്തമാക്കി.

സ്‌കൂളിൽ ശിരോവസ്ത്ര വിലക്ക് ഏർപ്പെടുത്തിയ നടപടി പിൻവലിക്കണമെന്നും അധികൃതർക്കെതിരേ നടപടിയെടുക്കണമെന്നുമാവശ്യപ്പെട്ട് രക്ഷിതാവ് ഇന്ന് വിദ്യാഭ്യാസമന്ത്രി വി. ശിവൻകുട്ടിയെ നേരിൽ കാണുന്നുണ്ട്. ശിരോവസ്ത്രം അനുവദിക്കാത്തത് സംബന്ധിച്ച് പ്രൊവിഡൻസ് സ്‌കൂളിനെതിരേ നേരത്തെയും പരാതി ഉയർന്നിരുന്നു.
അതേസമയം, വിലക്ക് ഭരണഘടനാ വിരുദ്ധമാണെന്ന് എസ്.കെ.എസ്.എസ്.എഫ് അഭിപ്രായപ്പെട്ടു. ഐ.എൻ.എൽ സംസ്ഥാന ഓർഗനൈസിങ് സെക്രട്ടറി എൻ.കെ അബ്ദുൽ അസീസ് സ്‌കൂളിലെത്തി പ്രിൻസിപ്പലുമായി സംസാരിച്ചു. എം.എസ്.എഫ് ഹരിതയും ഐ.എൻ.എലും ഇന്ന് സ്‌കൂളിലേക്ക് പ്രതിഷേധ മാർച്ച് സംഘടിപ്പിച്ചിട്ടുണ്ട്.