ചണ്ഡീഗഢ്: രാഷ്ട്രീയ തിരക്കുകള്‍ക്കിടയിലും മൂന്ന് വര്‍ഷം മുമ്പ് നല്‍കിയ വാക്ക് പാലിച്ച് ലോക്‌സഭാ പ്രതിപക്ഷ നേതാവ് രാഹുല്‍ ഗാന്ധി. ഹരിയാനയിലെ സോനിപത് ജില്ലയിലുള്ള മദിന ഗ്രാമത്തിലെ സാധാരണക്കാരനായ സഞ്ജയ് എന്ന കര്‍ഷകന്റെ മകള്‍ തനുവിന്റെ വിവാഹത്തിനാണ് രാഹുല്‍ അപ്രതീക്ഷിത അതിഥിയായെത്തിയത്. രോഹ്തക് എം.പി ദീപേന്ദര്‍ സിങ് ഹൂഡയ്‌ക്കൊപ്പമെത്തിയ രാഹുലിനെ ഗ്രാമവാസികള്‍ പരമ്പരാഗതമായ വെളുത്ത തലപ്പാവ് അണിയിച്ചാണ് സ്വീകരിച്ചത്.

2023 ജൂലൈ 8ന് മദിന ഗ്രാമം സന്ദര്‍ശിച്ചപ്പോഴാണ് സഞ്ജയിന്റെ കുടുംബവുമായി രാഹുല്‍ ഗാന്ധി ആത്മബന്ധം സ്ഥാപിക്കുന്നത്. അന്ന് പാടത്തിറങ്ങി നെല്ല് നടാനും ട്രാക്ടര്‍ ഓടിക്കാനും കൂടിയ രാഹുല്‍ പിന്നീട് സഞ്ജയിനെയും കുടുംബത്തെയും ഡല്‍ഹിയിലെ വസതിയിലേക്ക് ഉച്ചഭക്ഷണത്തിന് ക്ഷണിച്ചിരുന്നു. മകളുടെ വിവാഹത്തിന് വരണമെന്ന് നേരിട്ടെത്തി സഞ്ജയ് അപേക്ഷിച്ചപ്പോള്‍ വരാമെന്ന് രാഹുല്‍ ഉറപ്പുനല്‍കുകയായിരുന്നു.

 ALSO READ: അടുക്കള യുദ്ധം; പ്രകൃതിവാതക വിതരണം നിയന്ത്രിക്കാൻ അവശ്യവസ്തു നിയമം ബാധകമാക്കി കേന്ദ്രം, ഗാർഹിക, ഗതാഗത ആവശ്യങ്ങൾക്ക് പ്രഥമ പരിഗണന

വിവാഹ ചടങ്ങുകളില്‍ ഒരു മണിക്കൂറോളം ചെലവഴിച്ച അദ്ദേഹം വധുവിന് സമ്മാനങ്ങള്‍ നല്‍കുകയും ഹരിയാനയിലെ പരമ്പരാഗത മധുരപലഹാരമായ 'ചൂര്‍മ' കഴിക്കുകയും ചെയ്തു. വന്‍ ജനക്കൂട്ടവും കോണ്‍ഗ്രസ് പ്രവര്‍ത്തകരും പ്രിയപ്പെട്ട നേതാവിനെ കാണാന്‍ ഗ്രാമത്തില്‍ തടിച്ചുകൂടിയിരുന്നു. കര്‍ഷക കുടുംബത്തോടുള്ള രാഹുല്‍ ഗാന്ധിയുടെ ഈ ഹൃദ്യമായ ഇടപെടല്‍ സോഷ്യല്‍ മീഡിയയിലും ഇതിനോടകം ശ്രദ്ധേയമായിട്ടുണ്ട്.

lok sabha opposition leader rahul gandhi made a surprise visit to madina village in haryana's sonipat to attend the wedding of a farmer's daughter, fulfilling a personal promise he made to the family during a field visit in 2023.