തേഞ്ഞിപ്പലം: ബസുകള്‍ നിറുത്താതെ പോകുന്നത് വിദ്യാര്‍ഥികളെയും മറ്റു യാത്രക്കാരെയും അലട്ടുന്നു. രാവിലെ ഒന്‍പതിനും പത്തിനുമിടയില്‍ തയ്യിലക്കടവ് ബസ് സ്‌റ്റോപ്പില്‍ വാഹനം കാത്തുനില്‍ക്കുന്നവര്‍ക്കാണ് ഈ ദുരിതം. തയ്യിലക്കടവില്‍ നിന്നു ചേളാരി, യൂനിവേഴ്‌സിറ്റി എന്നിവിടങ്ങളിലെ സ്‌കൂളിലേയ്ക്ക് പോകുന്ന വിദ്യാര്‍ഥികളാണ് ഇക്കാരണത്താല്‍ പ്രയാസപ്പെടുന്നത്.
ബസ് നിറുത്താത്തതിനാല്‍ പലപ്പോഴും ഇവരുടെ പഠനം മുടങ്ങുകയാണ്. സ്‌കൂളില്‍ പോകുവാനുള്ള തയാറെടുപ്പുമായി രാവിലെ ഒന്‍പതിന് ബസ് സ്റ്റോപ്പിലെത്തിയാല്‍ ചില ദിവസങ്ങളില്‍ ഒരു മണിക്കൂറിലധികം നേരം നിന്ന് വീട്ടിലേക്ക് മടങ്ങേണ്ട അവസ്ഥയാണ്. നിരവധി ബസുകള്‍ ഇതുവഴി കടന്നുപോകുന്നുണ്ട്.വിദ്യാര്‍ഥികളെ കയറ്റാതെ പോകുന്ന ബസുകള്‍ക്കെതിരേ നടപടിയെടുക്കാന്‍ അധികൃതര്‍ തയാറാകണമെന്ന ആവശ്യം ശക്തമാണ്.