അഹമ്മദാബാദ്: പരിവര്‍ത്തന്‍ സങ്കല്‍പ് റാലി'യില്‍ നിരവധി വാഗ്ദാനങ്ങളുമായി രാഹുല്‍ ഗാന്ധി. ഗുജറാത്തില്‍ കോണ്‍ഗ്രസ് അധികാരത്തില്‍ വന്നാല്‍ 3 ലക്ഷം രൂപ വരെയുള്ള കര്‍ഷക വായ്പ എഴുതിത്തള്ളുമെന്നും 1000 രൂപയ്ക്ക് ലഭിക്കുന്ന പാചക വാതകം 500 രൂപയ്ക്ക് നല്‍കുമെന്നും രാഹുല്‍ ഗാന്ധി പറഞ്ഞു.

കര്‍ഷകര്‍ക്ക് വൈദ്യുതി സൗജന്യമായി നല്‍കും. സാധാരണ ഉപഭോക്താക്കള്‍ക്ക് 300 യൂണിറ്റ് വരെ സൗജന്യ വൈദ്യുതി നല്‍കുമെന്നും അദ്ദേഹം വ്യക്തമാക്കി. അഹമ്മദാബാദിലെ സബര്‍മതി നദീതീരത്ത് കോണ്‍ഗ്രസ് പ്രവര്‍ത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

10 ലക്ഷം പുതിയ തൊഴിലവസരങ്ങള്‍ സൃഷ്ടിക്കുമെന്നും 3,000 ഇംഗ്ലീഷ് മീഡിയം സ്‌കൂളുകള്‍ തുറക്കുമെന്നും പെണ്‍കുട്ടികള്‍ക്ക് സൗജന്യ വിദ്യാഭ്യാസം നല്‍കുമെന്നും രാഹുല്‍ ഉറപ്പ് നല്‍കി. ക്ഷീര കര്‍ഷകര്‍ക്ക് പാല്‍ ലിറ്ററിന് അഞ്ച് രൂപ സബ്‌സിഡി നല്‍കുമെന്നും രാഹുല്‍ വാഗ്ദാനം ചെയ്തു. ഡിസംബറിലാണ് ഗുജറാത്ത് നിയമസഭാ തെരഞ്ഞടുപ്പ് നടക്കാനിരിക്കുന്നത്.