ആലപ്പുഴ: ചെന്നിത്തലയില്‍ അച്ചന്‍കോവിലാറില്‍ പള്ളിയോടം മറിഞ്ഞുണ്ടായ അപകടത്തില്‍ കാണാതായ മൂന്നാമത്തെയാളുടെ മൃതദേഹവും കണ്ടെടുത്തു. ചെന്നിത്തല സ്വദേശി രാകേഷിന്റെ മൃതദേഹമാണ് കണ്ടെടുത്തത്. വള്ളം മറിഞ്ഞ സ്ഥലത്തുനിന്നും നൂറ് മീറ്റര്‍ അകലെ വലിയ പെരുമ്പുഴ പാലത്തിന് സമീപത്തുനിന്നാണ് രാകേഷിന്റെ മൃതദേഹം കണ്ടെടുത്തത്. അപകടത്തെ തുടര്‍ന്ന് നടത്തി തിരച്ചിലില്‍ പ്ലസ് ടു വിദ്യാര്‍ത്ഥി ആദിത്യന്‍, ചെറുകോല്‍പ്പുഴ സ്വദേശി വിനീഷ് എന്നിവരുടെ മൃതദേഹം ഇന്നലെ ലഭിച്ചിരുന്നെങ്കിലും രാകേഷിനെ കണ്ടെത്താനായിരുന്നില്ല.

ആറന്മുള ഉത്രട്ടാതി വള്ളംകളിയില്‍ പങ്കെടുക്കുന്നതിനായി നീറ്റിലിറക്കിയ ചെന്നിത്തല പള്ളിയോടമാണ് ഇന്നലെ അപകടത്തില്‍പ്പെട്ടത്. അച്ചന്‍കോവിലാര്‍ ചുറ്റിയ ശേഷം ആറന്മുളയിലേയ്ക്ക് പുറപ്പെടുന്നതിനായി വലിയ പെരുംപുഴ കടവില്‍ നിന്ന് പുറപ്പെട്ട ഉടനെയാണ് പള്ളിയോടം ദിശതെറ്റി മറിഞ്ഞത്. പരിധിയില്‍ കൂടുതല്‍ ആളുകള്‍ കയറിയതോടെ നിയന്ത്രണം നഷ്ടപ്പെട്ടാണ് പള്ളിയോടം മറിഞ്ഞതെന്നാണ് നാട്ടുകാരുടെ പ്രതികരണം. അപകടകാരണം ഇനിയും വ്യക്തമാക്കാത്തതിനാല്‍ ജില്ലാ കളക്ടര്‍ അന്വേഷണത്തിന് ഉത്തരവിട്ടിട്ടുണ്ട്. അപകടം എങ്ങനെയുണ്ടായെന്ന് വിശദമായി പരിശോധിക്കുമെന്ന് മന്ത്രി പി പ്രസാദ് അറിയിച്ചു.