പള്ളിക്കല്‍: കുട്ടികളില്‍ മതവിദ്യാഭ്യാസം നേടിയെടുക്കുന്നതില്‍ ബോധവാന്‍മാരാക്കേണ്ടതുണ്ടെന്നും ഇക്കാര്യത്തില്‍ രക്ഷിതാക്കളുടെ പങ്ക് വലുതാണെന്നും മദ്‌റസ മാനേജ്‌മെന്റ് സംസ്ഥാന ജനറല്‍ സെക്രട്ടറി കെ.എം അബ്ദുള്ള മാസ്റ്റര്‍ കൊട്ടപ്പുറം പറഞ്ഞു. പരുത്തിക്കോട് മഹല്ല് കമ്മിറ്റിയുടെ ആഭിമുഖ്യത്തില്‍ സംഘടിപ്പിച്ച ഖുര്‍ആന്‍ പാരായണ മത്സര വിജയികള്‍ക്കുള്ള ക്യാഷ് അവാര്‍ഡുകളുടെ വിതരണോദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. പരുത്തിക്കോട് ബയാനുല്‍ ഹുദാ ഹയര്‍ സെക്കന്‍ഡറി മദ്‌റസയിലെ 22 വിദ്യാര്‍ഥികള്‍ക്കായി ഒരു ലക്ഷത്തിഇരുപതിനായിരം രൂപയുടെ ക്യാഷ് അവാര്‍ഡുകളാണ് വിതരണം ചെയ്തത്.
ചടങ്ങില്‍ ടി അഹമ്മദ് ഹാജി അധ്യക്ഷനായി. അബൂബക്കര്‍ ഫൈസി മേലാറ്റൂര്‍, എം അബ്ദുല്‍മജീദ്, കെ.പി മുഹമ്മദ് നിസാമി, ചെമ്പായി ബഷീര്‍ യമാനി, ഇല്ല്യാസ് ഫൈസി, അബ്ദുല്‍ഹമീദ് ഫൈസി, ബാവ മാസ്റ്റര്‍ സംസാരിച്ചു.