തിരുവനന്തപുരം: മുഹമ്മദ് ഷാഫി മതഭീകരവാദ സംഘടനയിലെ അംഗമാണെന്നും നരബലി നടപ്പാക്കിയതിന് പിന്നില്‍ മത ഭീകരവാദമാണെന്നും ബി.ജെ.പി സംസ്ഥാന പ്രസിഡന്റ് കെ. സുരേന്ദ്രന്‍. ഭഗവല്‍ സിങ്ങ് സിപിഎമ്മിന്റെ പ്രാദേശിക മുഖമാണ്. സിപിഎം എന്ത് കൊണ്ട് മെമ്പര്‍ഷിപ്പില്‍ നിന്ന് ഭഗവല്‍ സിംഗിനെ പുറത്താക്കുന്നില്ല. ഭഗവല്‍ സിംഗ് കോണ്‍ഗ്രസോ ബി ജെപിയോ ആയിരുന്നെങ്കില്‍ എന്തായിരിക്കും അവസ്ഥ.

കേരളത്തിന് പുറത്തായിരുന്നു ഇത്തരമൊരു സംഭവമെങ്കില്‍ എങ്ങനെയാകുമായിരുന്നു പ്രതികരണങ്ങള്‍ സാംസ്‌കാരിക നായകന്‍മാര്‍ എവിടെ പോയി? അര്‍ബന്‍ നെക്‌സലുകളും മെഴുകുതിരി പ്രകടനങ്ങളും എവിടെ? എല്‍ദോസ് കുന്നപ്പള്ളിക്കെതിരെ എന്താണ് സര്‍ക്കാരിന് പറയാനുള്ളത് ? ഒരു നടപടിയും ഉണ്ടാകാന്‍ പോകുന്നില്ലെന്ന് പറഞ്ഞ കെ സുരേന്ദ്രന്‍, കോണ്‍ഗ്രസ് നേതാക്കള്‍ എന്താണ് മിണ്ടാത്തത് എന്നും ചോദിച്ചു.

ഇലന്തൂരിലെ നരബലി കേസില്‍ റിമാന്‍ഡ് റിപ്പോര്‍ട്ട് 24ന് ലഭിച്ചു. സാമ്പത്തിക ഉന്നതിയും ഐശ്വര്യവും ഉണ്ടാകുന്നതിന് ദേവീ പ്രീതിക്കായി നടത്തിയ മനുഷ്യക്കുരുതി എന്നാണ് റിമാന്‍ഡ് റിപ്പോര്‍ട്ടില്‍ പറയുന്നത്. ഇരകളുടെ മുതലുകള്‍ കണ്ടെടുക്കണമെന്നും കൂടുതല്‍ ഇരകള്‍ ഉണ്ടോയെന്ന് അന്വേഷിക്കണമെന്നും റിപ്പോര്‍ട്ടില്‍ പറയുന്നുണ്ട്. നരബലിയെ കൂടാതെ ഇവര്‍ക്ക് മറ്റേതെങ്കിലും ഉദ്ദേശമുണ്ടോയെന്ന് അന്വേഷിക്കണം. പ്രതികള്‍ തുടര്‍ന്നും കുറ്റകൃത്യം ചെയ്യാന്‍ സാധ്യതയുണ്ടെന്ന് പൊലീസ് റിമാന്‍ഡ് റിപ്പോര്‍ട്ടില്‍ വ്യക്തമാക്കുന്നുണ്ട്.