തെഹ്‌റാന്‍: യു.എസിന്റെയും ഇസ്‌റാഈലിന്റെയും സംയുക്ത ആക്രമണത്തില്‍ കൊല്ലപ്പെട്ട പരമോന്നത നേതാവ് ആയത്തുല്ല അലി ഖാംനഇയുടെയും സൈനിക മേധാവി മുഹമ്മദ് പാക്പൂരിന്റെയും പകരക്കാരെ കണ്ടെത്താനുള്ള നടപടികള്‍ തുടങ്ങി. ഇറാന്റെ താല്‍ക്കാലിക ലീഡര്‍ഷിപ്പ് കൗണ്‍സിലിലെ ജൂറിസ്റ്റ് അംഗമായി ആയത്തുല്ല അലി രിസാ അറഫിയെ നിയമിച്ചതായി ഇസ്‌നവാര്‍ത്താ ഏജന്‍സി റിപ്പോര്‍ട്ട് ചെയ്തു. പുതിയ പരമോന്നത നേതാവിനെ വിദഗ്ധ സമിതി തെരഞ്ഞെടുക്കുന്നത് വരെയാണ് ഈ കൗണ്‍സില്‍ ചുമതല വഹിക്കുക. പ്രസിഡന്റ് മസൂദ് പെസെഷ്‌കിയാന്‍, ചീഫ് ജസ്റ്റിസ് ഗുലാം ഹുസൈന്‍ മൊഹ്‌സിന്‍ ഹിജൈ എന്നിവരോടൊപ്പം അലിറാസ അറഫിയും ഈ താല്‍ക്കാലിക കൗണ്‍സിലില്‍ അംഗമായിരിക്കും.
നിലവില്‍ ഗാര്‍ഡിയന്‍ കൗണ്‍സിലിലെ മതപണ്ഡിതനായ അംഗമാണ് അറാഫി. രാജ്യത്തെ പുതിയ പരമോന്നത നേതാവിനെ നിയമിക്കുന്നത് വരെയുള്ള ഭരണപരമായ കാര്യങ്ങളില്‍ ഈ കൗണ്‍സില്‍ നേതൃത്വം നല്‍കും. 

ഇറാനിലെ സവിശേഷ സൈനിക വിഭാഗമായ ഇസ്‌ലാമിക് റെവല്യൂഷണറി ഗാര്‍ഡ് കോര്‍പ്‌സിന്റെ (ഐ.ര്‍.ജി.സി) പുതിയ കമാന്‍ഡര്‍ ഇന്‍ ചീഫായി ബ്രിഗേഡിയര്‍ ജനറല്‍ അഹമ്മദ് വാഹിദിയെയും നിയമിച്ചു. കഴിഞ്ഞ ആറ് മാസമായി ഇടക്കാല മേധാവിയായി സേവനമനുഷ്ഠിച്ചു വരികയായിരുന്നു അദ്ദേഹം. നേരത്തെ ഇറാന്റെ പ്രതിരോധ മന്ത്രിയായും ആഭ്യന്തര മന്ത്രിയായും അദ്ദേഹം പ്രവര്‍ത്തിച്ചിട്ടുണ്ട്.
അമേരിക്കയും ഇസ്‌റാഈലും സംയുക്തമായി നടത്തിയ സൈനിക നീക്കത്തില്‍ മുന്‍ മേധാവി മുഹമ്മദ് പാക്പൂര്‍ കൊല്ലപ്പെട്ടതിനെത്തുടര്‍ന്നാണ് വാഹിദിയുടെ നിയമനം. പരമോന്നത നേതാവിന്റെയും സൈനിക തലവന്മാരുടെയും വധത്തിന് ശക്തമായ ഭാഷയില്‍ ഐആര്‍ജിസി തിരിച്ചടി നല്‍കുമെന്ന് പ്രഖ്യാപിച്ചു. ഖാംനഈയുടെ കൊലപാതകികള്‍ക്ക് ചരിത്രത്തിലെ ഏറ്റവും കഠിനമായ ശിക്ഷ നല്‍കുമെന്ന് സൈന്യം മുന്നറിയിപ്പ് നല്‍കി. അമേരിക്കയുടെയും സയണിസ്റ്റ് ഭരണകൂടത്തിന്റെയും നടപടി അന്താരാഷ്ട്ര നിയമങ്ങളുടെയും ധാര്‍മ്മികതയുടെയും ലംഘനമാണെന്ന് ഐആര്‍ജിസി പ്രസ്താവനയില്‍ പറഞ്ഞു.

Summary: Following a joint military operation by the United States and Israel, Iran has confirmed the martyrdom of Supreme Leader Ayatollah Ali Khamenei and IRGC Commander Mohammad Pakpour. A clerical member of the Guardian Council, Alireza Arafi, has been appointed as the jurist member of a temporary Leadership Council. Arafi will manage state affairs alongside President Masoud Pezeshkian and Chief Justice Gholamhossein Mohseni Ejei until the Assembly of Experts elects a permanent successor. Brigadier General Ahmad Vahidi, a former Minister of Defence and Interior, has been named the new Commander-in-Chief of the Islamic Revolutionary Guard Corps.