അഞ്ചു കിലോമീറ്ററിലധികം മലയോര ഹൈവേയുടെ നിർമാണം വീതി കുറക്കുന്നു

കൽപ്പറ്റ • റോഡ് വികസനത്തിന് ഭൂമി നൽകാത്ത വൻകിട തോട്ടങ്ങൾക്ക് മുന്നിൽ മുട്ടുമടക്കി സർക്കാർ.
റോഡ് നിർമാണത്തിനാവശ്യമായ സ്വകാര്യഭൂമികൾ സൗജന്യനിരക്കിൽ നേടിയ ശേഷം തോട്ടങ്ങളിലൂടെയുള്ള ഭാഗങ്ങളിൽ ഭൂമി ലഭ്യമാക്കാൻ നടപടി സ്വീകരിക്കാതെ റോഡ് വീതി കുറച്ച് നിർമിക്കാനുള്ള നീക്കം തുടങ്ങി. കാസർകോട്-കണ്ണൂർ-വയനാട്-മലപ്പുറം ജില്ലകളെ ബന്ധിപ്പിക്കുന്ന മലയോര ഹൈവേയുടെ ഭാഗമായ മേപ്പാടി-ചൂരൽമല റോഡ് നിർമാണത്തിലാണ് എച്ച്.എം.എൽ ഉൾപ്പെടെയുള്ള വൻകിട തോട്ടങ്ങൾക്ക് സർക്കാർ ഇളവ് നൽകുന്നത്.
12.800 കിലോമീറ്റർ റോഡിൽ അഞ്ചു കിലോമീറ്ററിലധികം എച്ച്.എം.എൽ, പോഡാർ, എ.വി.ടി തോട്ടങ്ങളിലൂടെയാണ് കടന്നുപോകുന്നത്.
ഇവിടങ്ങളിൽ ഭൂമി ലഭ്യമാക്കാതെ വീതി കുറച്ച് റോഡ് നിർമിക്കാനാണ് നീക്കം നടക്കുന്നത്. എച്ച്.എം.എൽ ഭൂമി വിട്ടുനൽകാത്തത് കാരണം മൂന്നര വർഷം മുമ്പ് പ്രവൃത്തി തുടങ്ങിയ റോഡ് നിർമാണം നിലച്ചിരിക്കുകയാണ്.
സ്വകാര്യഭൂമികളുള്ള ഭാഗങ്ങളിലും ഭൂമി ഏറ്റെടുക്കൽ ആവശ്യമില്ലാത്ത ഭാഗങ്ങളിലും 12 മീറ്റർ വീതിയിലാണ് റോഡ് നിർമിച്ചത്.
പല കാരണങ്ങളാൽ നിലവിലെ ടെൻഡർ റദ്ദാക്കിയിട്ടുണ്ട്. തുടർന്ന് ഭൂമി ഏറ്റെടുക്കൽ ഒഴിവാക്കി വീതി കുറച്ച് റോഡ് നിർമിക്കുന്നതിനുള്ള ടെൻഡർ നടപടികൾ പുരോഗമിക്കുകയാണ്. എച്ച്.എം.എൽ ഉൾപ്പെടെയുള്ള തോട്ടങ്ങൾ അനധികൃതമായി കൈവശം വച്ചിരിക്കുന്ന രാജമാണിക്യം കമ്മിഷൻ കണ്ടെത്തിയ ഏക്കർ കണക്കിന് ഭൂമി തിരിച്ചുപിടിക്കാനുള്ള നടപടികളിൽ മെല്ലെപ്പോക്ക് തുടരുന്ന സർക്കാർ റോഡ് വികസനത്തിന് ഭൂമി ഏറ്റെടുക്കുന്ന കാര്യത്തിലും വൻകിടക്കാർക്ക് അനുകൂലമായി നീങ്ങുകയാണെന്ന ആക്ഷേപമാണ് ശക്തമാകുന്നത്.