ദുബൈ: മാനത്തെ അപൂര്‍വ ദൃശ്യം കണ്ട് നിരവധി പേര്‍. ചൊവ്വാഴ്ച യു.എ.ഇയില്‍ ഭാഗിക സൂര്യഗ്രഹണം ദൃശ്യമായി. ഉച്ചക്കുശേഷം 2.45 മുതല്‍ വൈകീട്ട് 4.55 വരെയാണ് ഈ വര്‍ഷത്തെ അവസാനത്തെ ഗ്രഹണം ദൃശ്യമായത്. സൂര്യനെ പകുതിയോളം മായ്ക്കുന്ന തരത്തിലാണ് ദുബൈയില്‍ കാണാനായത്. വിവിധ സ്ഥലങ്ങളില്‍ വാനനിരീക്ഷകരും സാധാരണക്കാരും അപൂര്‍വ ദൃശ്യം കണ്ടു. നേത്രസംരക്ഷണ സംവിധാനങ്ങളോടെ മാത്രമേ ഗ്രഹണ സമയത്ത് സൂര്യനെ നിരീക്ഷിക്കാന്‍ പാടുള്ളൂവെന്ന് അധികൃതര്‍ മുന്നറിയിപ്പ് നല്‍കിയിരുന്നു. ഓണ്‍ലൈന്‍ ദൃശ്യങ്ങളിലൂടെയും പലരും ഗ്രഹണം വീക്ഷിച്ചു. ദുബൈ അസ്‌ട്രോണമി ഗ്രൂപ്പിന്റെ സംയുക്ത സഹകരണത്തോടെ റോബോട്ട്മിയ ടെക്‌നോളജീസ് ദുബൈയിലെ അല്‍ തുറൈയ അസ്‌ട്രോണമി സെന്ററില്‍ നിരീക്ഷണ സംവിധാനങ്ങള്‍ ഒരുക്കിയിരുന്നു. വിവിധ എമിറേറ്റുകളിലെ പള്ളികളില്‍ അസ്ര്‍ നിസ്‌കാര ശേഷം സൂര്യഗ്രഹണ സമയത്ത് പ്രത്യേക നമസ്‌കാരവും സംഘടിപ്പിച്ചു. ഇസ്ലാമിക കാര്യ വകുപ്പുകളുടെ നിര്‍ദേശമനുസരിച്ചായിരുന്നു നിസ്‌കാരം ഒരുക്കിയത്. നിരവധി വിശ്വാസികള്‍ ഇതില്‍ പങ്കെടുത്തു.