ജിദ്ദ: ഹജ്ജ് നിര്‍വഹിക്കാനെത്തിയ ഇന്ത്യന്‍ തീര്‍ഥാടകരില്‍ ഇതുവരെ 12 ഹാജിമാര്‍ മരിച്ചതായി ഇന്ത്യന്‍ ഹജ്ജ് മിഷന്‍. ഇവര്‍ വിവിധ സംസ്ഥാനങ്ങളില്‍ നിന്നുള്ളവരാണ്. ഇവരുടെ എല്ലാം മൃതദേഹങ്ങള്‍ ജന്നത്തുല്‍ ബഖീഇയിലാണ് ഖബറടക്കിയത്. കുടാതെ വിവിധ അസുഖത്തെ തുടര്‍ന്ന് മദീനയിലെ ആശുപത്രികളില്‍ 24 തീര്‍ഥാടകരെയും പ്രവേശിപ്പിച്ചിട്ടുണ്ട്. ഇവരുടെ രോഗങ്ങള്‍ ഗുരുതരമല്ലെന്നും ഇവര്‍ അടുത്ത ദിവസങ്ങളില്‍ മക്കയിലേക്ക് പുറപ്പെടുമെന്നും ഹജ്ജ് മിഷന്‍ അറിയിച്ചു.
ഇന്നലെ മദീനയില്‍ നിന്നും ബസ് മാര്‍ഗം 3485 തീര്‍ഥാടകര്‍ മക്കയിലെത്തി. ഇനി 11,716 ഇന്ത്യന്‍ തീര്‍ഥാടകരാണ് മദീനയില്‍ അവശേഷിക്കുന്നത്. ഇവരും വരും ദിവസങ്ങളില്‍ മദീനയില്‍ നിന്നു മക്കയിലെത്തും.