മട്ടാഞ്ചേരി: കുത്തിവയ്ക്കാന്‍ സൂചിയില്ലാത്തതിനാല്‍ കൊച്ചി നഗരസഭാ പരിധിയില്‍ കൊവിഡ് വാക്‌സിനേഷന്‍ മുടങ്ങി. നഗരപരിധിയിലെ ഓട്ടോ തൊഴിലാളികള്‍, വ്യാപാരി വ്യവസായികള്‍ എന്നിവര്‍ക്കുള്ള സ്‌പെഷ്യല്‍ വാക്‌സിനേഷന്‍ ക്യാംപ് ആണ് തടസപ്പെട്ടത്.

ഒപ്പം സ്‌പോട്ട് രജിസേ്ട്രഷന്‍ വഴി കൊവിഷീല്‍ഡ് സെക്കന്റ് ഡോസ് എടുക്കാനെത്തിയവരും നഗരസഭയുടേയും ആരോഗ്യവകുപ്പിന്റേയും അനാസ്ഥ മൂലം നിരാശരായി മടങ്ങി. ഞായറാഴ്ച രാത്രി വൈകിയാണ് വാക്‌സിനേഷന്‍ മാറ്റിവച്ചതായി കൗണ്‍സിലര്‍മാര്‍ക്ക് അറിയിപ്പ് ലഭിച്ചത്.

ഇതിനകം തന്നെ കൗണ്‍സിലര്‍മാര്‍ വാക്‌സിന്‍ എടുക്കേണ്ടവര്‍ക്ക് അറിയിപ്പ് നല്‍കിയിരുന്നു. ക്യാംപ് മാറ്റിവച്ചതറിയാതെ രാവിലെ എത്തിയ നൂറുകണക്കിനു പേരാണ് വാക്‌സിനേഷന്‍ കേന്ദ്രങ്ങള്‍ പൂട്ടിക്കിടക്കുന്നത് കണ്ട് നിരാശരായി മടങ്ങിയത്. വാക്‌സിന്‍ നല്‍കാന്‍ നഗരസഭാ കോ-ഓഡിനേഷന്‍ കമ്മിറ്റി തീരുമാനിച്ചിരുന്നെങ്കിലും ആവശ്യമായ സിറിഞ്ച് ഇല്ല എന്ന് മേയര്‍ അറിയിച്ചതിനെ തുടര്‍ന്നാണ് കുത്തിവയ്പ്പ് മാറ്റിവച്ചതെന്ന് നഗരസഭാ പ്രതിപക്ഷനേതാവ് ആന്റണി കുരീത്തറ പറഞ്ഞു.
ഇതില്‍ പ്രതിഷേധിച്ച് നഗരസഭാ കവാടത്തില്‍ യു.ഡി.എഫ് കൗണ്‍സിലര്‍മാര്‍ നടത്തിയ 'സൂചി തരാം വാക്‌സിന്‍ തരൂ' സമരം ടി.ജെ.വിനോദ് എം.എല്‍.എ ഉദ്ഘാടനം ചെയ്തു. കേന്ദ്ര സര്‍ക്കാര്‍ വാക്‌സിനും സിറിഞ്ചും ഒരുമിച്ചാണ് നല്‍കുന്നതെന്നിരിക്കെ നഗരസഭയുടെ കൈവശമുള്ള അയ്യായിരത്തോളം സിറിഞ്ച് എവിടെപ്പോയെന്ന് മേയര്‍ വ്യക്തമാക്കണമെന്ന് ടി.ജെ.വിനോദ് ആവശ്യപ്പെട്ടു.