സ്വന്തം ലേഖകന്‍
തിരുവനന്തപുരം: സംസ്ഥാനത്ത് കഴിഞ്ഞ അഞ്ചുവര്‍ഷത്തിനിടയിലുണ്ടായ വിവിധ പ്രകൃതിദുരന്തങ്ങളില്‍ കെ.എസ്.ഇ.ബിക്കുണ്ടായത് 664 കോടി രൂപയുടെ നാശനഷ്ടം. ഇടക്കിടെയുണ്ടായ ചുഴലിക്കാറ്റുകളും മണ്‍സൂണ്‍ സീസണിലുണ്ടായ കനത്ത മഴയും കാറ്റുമാണ് നഷ്ടം വിതച്ചത്. കഴിഞ്ഞ മൂന്നു വര്‍ഷങ്ങളെ അപേക്ഷിച്ച് ഈ വര്‍ഷം ഇതുവരെ നാശനഷ്ടം കുറവാണെന്നും കെ.എസ്.ഇ.ബിയുടെ കണക്കുകള്‍ വ്യക്തമാക്കുന്നു.
അഞ്ചുവര്‍ഷത്തിനിടയില്‍ ഏറ്റവുമധികം നാശനഷ്ടമുണ്ടായത് 2019ലുണ്ടായ പ്രളയത്തിലാണ്. 243.05 കോടിയുടെ നഷ്ടം. 2018ലെ പ്രളയത്തില്‍ 242.45 കോടിയുടെയും നാശനഷ്ടമുണ്ടായി.2017ലുണ്ടായ ഓഖി ചുഴലിക്കാറ്റില്‍ 46.11 കോടിയുടെ നഷ്ടമുണ്ടായി. കഴിഞ്ഞ വര്‍ഷം ഓഗസ്റ്റില്‍ കാലവര്‍ഷത്തിന്റെ ഭാഗമായുണ്ടായ കാറ്റിലും മഴയിലും 86.18 കോടിയുടെയും ഈ വര്‍ഷം ടൗട്ടെ ചുഴലിക്കാറ്റിനെ തുടര്‍ന്ന് 46.65 കോടിയുടെയും നാശനഷ്ടമുണ്ടായി.
കഴിഞ്ഞ മാസം കാലവര്‍ഷത്തിന്റെ ഭാഗമായുണ്ടായ കാറ്റിലും മഴയിലും സംസ്ഥാനവ്യാപകമായി നാശനഷ്ടങ്ങളുണ്ടായിരുന്നു. എന്നാല്‍ അതിനുശേഷം കാലവര്‍ഷം ദുര്‍ബലമായതോടെ നഷ്ടത്തിന്റെ തോതും കുറഞ്ഞു.