തിരുവനന്തപുരം: തലസ്ഥാനത്ത് ഇനി വാഹനത്തിലിരുന്ന് കൊവിഡ് വാക്‌സിനെടുക്കാം. പദ്ധതിക്ക് തിരുവനന്തപുരം വിമന്‍സ് കോളേജില്‍ തുടക്കമായി.വാക്സിനേഷന്‍ വിലയിരുത്താന്‍ ആരോഗ്യമന്ത്രി കോളജില്‍ സന്ദര്‍ശനം നടത്തും. സാഹചര്യം പഠിച്ച ശേഷം ഡ്രൈവ് ത്രൂ വാക്സിനേഷന്‍ കൂടുതല്‍ സെന്ററിലേക്ക് വ്യാപിപ്പിക്കുമെന്ന് തിരുവനന്തപുരം കലക്ടര്‍ നവജ്യോത് ഖോസ പറഞ്ഞു.

വാഹനത്തില്‍ വാക്സിനേഷന്‍ സെന്ററിലിരുന്നാല്‍ ആരോഗ്യ പ്രവര്‍ത്തകര്‍ വാഹനത്തിന് അടുത്തെത്തി കൊവിഡ് വാക്സിന്‍ നല്‍കും. ഇതിനു ശേഷം വാഹനത്തില്‍ തന്നെ അരമണിക്കൂര്‍ നിരീക്ഷണത്തില്‍ കഴിയാം.ഡ്രൈവ് ത്രൂ വാക്സിനേഷനില്‍ സ്പോട്ട് രജിസ്ട്രേഷന്‍ അനുവദിക്കില്ല. നേരത്തെ ഓണ്‍ലൈനായി രജിസ്റ്റര്‍ ചെയ്തവര്‍ക്ക് മാത്രമാണ് ഈ രീതിയില്‍ വാക്സിന്‍ നല്‍കുക. വാക്സിനേഷന്‍ സെന്ററുകളിലെ തിരക്ക് കുറയ്ക്കാനാണ് ഈ രീതിയില്‍ വാക്സിന്‍ നല്‍കുന്നത്.