കഴിഞ്ഞ ഓണ സമയത്ത് കൊവിഡ് കേസുകള്‍ രണ്ടായിരത്തോളം
ഇത്തവണ 20,000ന് മുകളില്‍

തിരുവനന്തപുരം: കൊവിഡ് കാലത്ത് മറ്റൊരു ഓണം കൂടി വന്നെത്തുമ്പോള്‍ എല്ലാവരും ജാഗ്രത പാലിക്കണമെന്ന് ആരോഗ്യവകുപ്പ്. കഴിഞ്ഞ ഓണ സമയത്ത് 2,000 ത്തോളം കൊവിഡ് കേസുകളാണ് ഉണ്ടായിരുന്നത്. എന്നാല്‍ ഓണം കഴിഞ്ഞതോടെയും നിയന്ത്രണങ്ങളില്‍ ഇളവ് അനുവദിച്ചതോടെയും കേസുകളില്‍ വലിയ വര്‍ധനവാണുണ്ടായത്.
ഇപ്പോള്‍ പ്രതിദിന കൊവിഡ് കേസുകള്‍ 20,000ന് മുകളിലാണ്. മൂന്നാം തരംഗ ഭീഷണിയും ഡെല്‍റ്റ വൈറസ് ഭീഷണിയും സംസ്ഥാനത്തുണ്ട്. ഇതിനാല്‍ ഓണം കഴിഞ്ഞ് രോഗ വ്യാപനമുണ്ടാകാതിരിക്കാന്‍ എല്ലാവരും ശ്രദ്ധിക്കണം. സോപ്പിട്ട് മാസ്‌കിട്ട് ഗ്യാപ്പിട്ട് ഓണമാഘോഷിക്കാം എന്നായിരുന്നു കഴിഞ്ഞ വര്‍ഷത്തെ സന്ദേശം. അത് ഇത്തവണയും തുടരണം.
സാധനങ്ങള്‍ വാങ്ങാന്‍ കടകളില്‍ പോകുമ്പോഴും ബന്ധുക്കളെ കാണുമ്പോഴും ജാഗ്രത പാലിക്കണം. കൊവിഡ് കാലമായതിനാല്‍ ഓണത്തിന് ബന്ധുക്കളുടെയും സുഹൃത്തുക്കളുടെയും ഒത്തുകൂടലുകള്‍ പരമാവധി കുറയ്ക്കണം. വീട്ടില്‍ അതിഥികളെത്തിയാല്‍ മാസ്‌ക് നിര്‍ബന്ധമാക്കണം. വന്നയുടന്‍ സോപ്പും വെള്ളവും ഉപയോഗിച്ച് കൈ കഴുകണം.
പ്രായമായവരെയും ചെറിയ കുട്ടികളെയും സ്പര്‍ശിച്ചു കൊണ്ടുള്ള സ്‌നേഹപ്രകടനം ഒഴിവാക്കണം. ഭക്ഷണം കഴിക്കുമ്പോള്‍ രോഗം പടരാന്‍ സാധ്യത കൂടുതലാണ്. ഇതിനാല്‍ സാമൂഹിക അകലം പാലിച്ച് സദ്യയ്ക്ക് ഇലയിടണം.
ലക്ഷണമില്ലാത്തവരില്‍ നിന്നും വാക്‌സിന്‍ എടുത്തവരില്‍ നിന്നും രോഗം പകരാമെന്നതിനാല്‍ പല കുടുംബങ്ങളില്‍ നിന്നുള്ളവര്‍ ഒരേസമയം ഒന്നിച്ചിരുന്ന് ഭക്ഷണം കഴിക്കുന്നത് ഒഴിവാക്കണം.
അല്‍പം ശ്രദ്ധിച്ച് ഓണമാഘോഷിച്ചാല്‍ ഓണം കഴിഞ്ഞും ഈ സന്തോഷം നിലനിര്‍ത്താമെന്നും ആരോഗ്യവകുപ്പ് അറിയിച്ചു.