നായ്ക്കട്ടി: നൂല്‍പ്പുഴ പഞ്ചായത്തിലെ തോട്ടാമൂലയില്‍ കാട്ടാനയിറങ്ങി, ഏക്കര്‍ കണക്കിന് കൃഷി നശിപ്പിച്ചു. കഴിഞ്ഞ ദിവസം രാത്രിയില്‍ ഇറങ്ങിയ ഒറ്റയാനാണ് കാര്‍ഷിക വിളകള്‍ ഉഴുതുമറിച്ചത്. ഇഞ്ചി, നെല്‍ കൃഷികളാണ് കൂടുതലായും നശിപ്പിച്ചത്. പ്രദേശവാസികളായ അച്ചുതന്‍, ഭാസ്‌ക്കരന്‍ എന്നിവര്‍ക്കാണ് കാട്ടാനയുടെ പരാക്രമണത്തില്‍ കൃഷിനാശമുണ്ടായത്.
വനാതിര്‍ത്തിയിലെ പ്രതിരോധ മാര്‍ഗങ്ങള്‍ തകര്‍ത്താണ് ആനകള്‍ ഇവിടേക്ക് കൂട്ടമായും ഒറ്റയായും ഇറങ്ങി നാശം വിതക്കുന്നത്. അച്ചുതന്റെ 300ഓളം ബെഡ് ഇഞ്ചിയാണ് ആന ചവിട്ടി നശിപ്പിച്ചത്. വട്ടതൊട്ടിയില്‍ ഭാസ്‌ക്കരന്റെ ഒരേക്കറോളം നെല്‍കൃഷിയും ആന ചവിട്ടിയും തിന്നും നശിപ്പിച്ചിട്ടുണ്ട്. വനാതിര്‍ത്തിയില്‍ നിര്‍മിച്ച കിടങ്ങ് തകര്‍ത്ത ആന കൃഷിയിടത്തില്‍ സ്ഥാപിച്ച വൈദ്യുതി വേലിയും തകര്‍ത്താണ് കൃഷിയിടത്തില്‍ പ്രവേശിച്ചത്.
കൃഷി നശിച്ചതോടെ കര്‍ഷകര്‍ സാമ്പത്തിക പ്രതിസന്ധിയില്‍ അകപ്പെട്ടിരിക്കുകയാണ്. കൃഷി നാശം തടയുന്നതിന്ന് അടിയന്തര നടപടിയും മതിയായ നഷ്ടപരിഹാരം നല്‍കണമെന്നാണ് കര്‍ഷകര്‍ ആവശ്യപ്പെടുന്നത്.