കൊച്ചി: നോര്‍ക്ക റൂട്ട്‌സിന്റെ യു.കെയിലേക്കുള്ള റിക്രൂട്ട്‌മെന്റ് ഡ്രൈവ് കൊച്ചിയില്‍ പുരോഗമിക്കുകയാണ്. 13, 202,21 എന്നീ തീയതികളില്‍ നടക്കുന്ന വരും ദിവസങ്ങളിലെ റിക്രൂട്ട്‌മെന്റ് ഹോട്ടല്‍ ലോ-മെറിഡിയനില്‍ വെച്ചാണ് നടത്തപ്പെടുന്നത്. 10ന് നടന്ന ആദ്യ ദിന റിക്രൂട്ട്‌മെന്റില്‍ 30 നേഴ്‌സുമാര്‍ക്ക് യു.കെയിലെ വിവിധ ആശുപത്രികളിലേക്ക് പ്രവേശനം ലഭിച്ചിരുന്നു. യു.കെയിലെവിവിധ എന്‍എച്ച്എസ് ട്രസ്റ്റുകളിലേയ്ക്ക് നഴ്‌സുമാര്‍ക്ക് അവസരങ്ങള്‍ സൃഷ്ടിക്കുന്നതാണ് വരാനിരിക്കുന്ന ദിവസങ്ങളിലെ റിക്രൂട്ട്‌മെന്റുകള്‍ എന്നാണ് നോര്‍ക്ക അറിയിച്ചിരിക്കുന്നത്.

യുകെയില്‍ നിന്നുള്ള എന്‍എച്ച്എസ് പ്രതിനിധികള്‍ ഉള്‍പ്പെടെ അഞ്ചംഗ സംഘമാണ് അഭിമുഖങ്ങള്‍ക്ക് നേതൃത്വം നല്‍കുന്നത്. ഒക്ടോബര്‍ 17, 18ന് മംഗളൂരു ഹോട്ടല്‍ താജ് വിവാന്തയിലും റിക്രൂട്ട്‌മെന്റ് സംഘടിപ്പിക്കുന്നുണ്ട്. നഴ്‌സിങ്ങില്‍ ബിരുദമോ ഡിപ്ലോമയോ വിദ്യാഭ്യാസ യോഗ്യതയും, ഇംഗ്ലീഷ് ഭാഷ പ്രാവീണ്യം തെളിയിക്കുന്ന IELTS/ OET യുകെ സ്‌കോറും ഉളള ഉദ്യോഗാര്‍ത്ഥികള്‍ക്ക് അപേക്ഷിക്കാം. നിലവില്‍ IELTS/ OET യോഗ്യത ഇല്ലാത്തവര്‍ക്കും പ്രസ്തുത പരീക്ഷയ്ക്ക് തയ്യാറെടുക്കുന്നവര്‍ക്കും ഉപാധികളോടെ പങ്കെടുക്കാവുന്നതാണ്.

താത്പര്യമുള്ള ഉദ്യോഗാര്‍ത്ഥികള്‍ [email protected] എന്ന ഇമെയില്‍ വിലാസത്തില്‍ ബയോഡാറ്റ, OET /IELTS സ്‌കോര്‍ കാര്‍ഡ്, യോഗ്യത തെളിയിക്കുന്ന സര്‍ട്ടിഫിക്കറ്റ്, പാസ്‌പോര്‍ട്ടിന്റെ പകര്‍പ്പ് എന്നിവ സഹിതം അപേക്ഷിക്കുക. അല്ലെങ്കില്‍ നോര്‍ക്ക ഇന്‍സ്റ്റിറ്റ്യൂട്ട് ഓഫ് ഫോറിന്‍ ലാംഗ്വേജിന്റെ വെബ്ബ്‌സൈറ്റ് (www.nifl.norkaroots.org) സന്ദര്‍ശിച്ചും അപേക്ഷ നല്‍കാവുന്നതാണ്. റിക്രൂട്ട്‌മെന്റ് പൂര്‍ണ്ണമായും സൗജന്യമാണ്.

റിക്രൂട്ട്‌മെന്റിനെക്കുറിച്ച് വിശദമായ വിവരങ്ങള്‍ അറിയാന്‍ ആഗ്രഹിക്കുന്നവര്‍ക്ക് നോര്‍ക്ക ഗ്ലോബല്‍ കോണ്‍ടാക്ട് സെന്ററിന്റെ ടോള്‍ ഫ്രീ നമ്പറായ 1800 4253 939ലേക്ക് ഇന്ത്യയില്‍ നിന്നും, +91 8802 012 345ലേക്ക് വിദേശത്തു നിന്നും (മിസ്ഡ് കോള്‍ സൗകര്യം) ബന്ധപ്പെടാവുന്നതാണ്. www.norkaroots.org, www.nifl.norkaroots.org എന്നീ വെബ്‌സൈറ്റുകളിലും വിവരങ്ങള്‍ ലഭ്യമാണെന്ന് നോര്‍ക്ക അറിയിച്ചു.

Content Highlights:norka recruitment for uk