ന്യൂഡല്‍ഹി: കൊവിഡ് വാക്‌സിന്‍ സ്ലോട്ടുകള്‍ വാട്‌സ്ആപ്പ് വഴിയും ബുക്ക് ചെയ്യാന്‍ കേന്ദ്ര ആരോഗ്യമന്ത്രാലയം സൗകര്യമൊരുക്കി. കേന്ദ്ര ആരോഗ്യമന്ത്രി മന്‍സുഖ് മാണ്ഡവ്യയാണ് ട്വിറ്ററിലൂടെ ഇക്കാര്യം അറിയിച്ചത്. സര്‍ക്കാരിന്റെ കോറോണ ഹെല്‍പ് ഡെസ്‌ക്കിന്റെ 9013151515 എന്ന നമ്പറിലേയ്ക്ക് ബുക്ക് സ്ലോട്ട് (book slot)  എന്ന് ഇംഗ്ലീഷില്‍ സന്ദേശമയക്കുകയാണ് ആദ്യം ചെയ്യേണ്ടത്. 

 

തുടര്‍ന്ന് എസ്.എം.എസായി ലഭിക്കുന്ന ഒ.ടി.പി വാട്‌സ്ആപ്പില്‍ ടൈപ്പ് ചെയ്താല്‍ സമീപത്തെ വാക്‌സിനേഷന്‍ കേന്ദ്രത്തിന്റെയും കുത്തിവയ്പ്പ് സമയക്രമത്തിന്റെയും വിശദാംശങ്ങള്‍ അറിയാം. പിന്നാലെ വേണ്ട തീയതി, സ്ഥലം, ഏത് വാക്‌സിന്‍ എന്നിവയും വാട്‌സ്ആപ്പ് വഴി തെരഞ്ഞെടുക്കാം. തുടര്‍ന്ന് കണ്‍ഫര്‍മേഷന്‍ സന്ദേശം ലഭിച്ചാല്‍ വാക്‌സിന്‍ സ്ലോട്ട് ബുക്ക് ആയതായി ഉറപ്പിക്കാം. നേരത്തെ വാട്‌സ്ആപ്പ് വഴി വാക്‌സിനേഷന്‍ സര്‍ട്ടിഫിക്കറ്റ് ലഭ്യമാക്കാനുള്ള നടപടി കേന്ദ്രസര്‍ക്കാര്‍ സ്വീകരിച്ചിരുന്നു.