തിരൂര്‍: താനൂരിലെ തീരദേശപ്രദേശമായ ചാപ്പപ്പടിയില്‍ മുസ്‌ലിം യൂത്ത് ലീഗ് പ്രവര്‍ത്തകനു നേരെ ആക്രമണം. താനൂര്‍ ആല്‍ബസാര്‍ സ്വദേശി കോയമ്മാടത്ത് കബീറിനെ (26) അക്രമി സംഘം കുത്തിപ്പരുക്കേല്‍പ്പിക്കുകയായിരുന്നു. വയറിനു കുത്തേറ്റു സാരമായി പരുക്കേറ്റ കബീറിനെ തിരൂര്‍ ജില്ലാ ആശുപത്രിയിലും തുടര്‍ന്ന് കോഴിക്കോട് മെഡിക്കല്‍ കോളജ് ആശുപത്രിയിലേക്കും മാറ്റി. ഇന്നലെ രാത്രി ഒന്‍പതോടെയാണ് സംഭവം.
ചാപ്പപ്പടിപാടം പ്രദേശത്ത് സുഹൃത്തുക്കളുമായി സംസാരിച്ചുകൊണ്ടിരിക്കെ അക്രമിസംഘം പിന്നില്‍ നിന്ന് കത്തികൊണ്ട് കുത്തുകയായിരുന്നു. കുത്തേറ്റു വീണ കബീറിനെ ഓടിക്കൂടിയ നാട്ടുകാരാണ് തിരൂര്‍ ജില്ലാ ആശുപത്രിയിലെത്തിച്ചത്. പ്രാഥമിക ശുശ്രൂഷ നല്‍കിയതിനു ശേഷം കോഴിക്കോട് മെഡിക്കല്‍ കോളജ് ആശുപത്രിയിലേക്ക് കൊണ്ടുപോകുകയായിരുന്നു.
ഇന്നലെ ഉച്ചക്ക് കബീറും ജ്യേഷ്ഠനും തമ്മിലുണ്ടായ തര്‍ക്കമാണ് സംഭവത്തില്‍ കലാശിച്ചതെന്നു സൂചന. ആക്രമണത്തിന് പിന്നില്‍ സി.പി.എം പ്രവര്‍ത്തകരാണെന്ന് മുസ്‌ലിം ലീഗ് നേതൃത്വം ആരോപിച്ചു. നേരത്തെ നാലോളം കേസുകളില്‍ പ്രതികളായവരാണ് ആക്രമികളെന്ന് സംഭവ സ്ഥലത്തുണ്ടായിരുന്നവര്‍ പറഞ്ഞു.