എടപ്പാള്‍: വിദ്യാര്‍ഥികളിലെ കുറ്റകൃത്യങ്ങള്‍ കുറക്കാന്‍ പൊന്നാനി പൊലിസിന്റെ നേതൃത്വത്തില്‍ അധ്യാപകര്‍ക്കു ക്ലാസ് നടത്തുന്നു. ഇതിന്റെ ഭാഗമായി പൊന്നാനി പൊലിസ് സ്റ്റേഷന്‍ പരിധിയിലെ വിവിധ സ്‌കൂളുകളില്‍നിന്നു തെരഞ്ഞെടുത്ത അധ്യാപകര്‍ക്കായി നാളെ പൊന്നാനി എം.ഇ.എസ് സ്‌കൂളില്‍ ഏകദിന ക്ലാസ് നടക്കും.
കോഴിക്കോട് ആസ്ഥാനമായി പ്രവര്‍ത്തിക്കുന്ന 'തണലു'മായി സഹകരിച്ചാണ് പദ്ധതി. ഡോ. പി.എന്‍ സുരേഷ് കുമാറിന്റെ നേതൃത്വത്തില്‍ സൈക്കോളജിസ്റ്റുകള്‍, സൈക്യാട്രിസ്റ്റ് സോഷ്യല്‍ വര്‍ക്കര്‍മാര്‍ എന്നിവര്‍ ക്യാംപില്‍ പങ്കെടുക്കും. കുട്ടികളുടെ സ്വഭാവ വൈകല്യങ്ങള്‍, പഠന പ്രശ്‌നങ്ങള്‍, അക്രമ വാസനയുള്ളതും ഭാവിയില്‍ ക്രിമിനലുകളായി തീരാന്‍ പ്രവണതയുള്ളതുമായ കുട്ടികള്‍, വ്യക്തിത്വ വൈകല്യമുള്ള കുട്ടികള്‍, മദ്യം മയക്കുമരുന്ന് എന്നിവ ഉപയോഗിക്കുന്നതോ അവയ്ക്ക് അടിമപ്പെടാന്‍ സാധ്യതയുള്ളതോ ആയ കുട്ടികള്‍ എന്നിവരെ കണ്ടെണ്ടത്തുന്നതിന്നും തിരുത്തല്‍ പ്രവര്‍ത്തങ്ങള്‍ നടത്തുന്നതിനും അധ്യാപകരെ പ്രാപ്തമാക്കുകയാണ് ലക്ഷ്യം.