മണ്ണാര്‍ക്കാട് : മണ്ണാര്‍ക്കാട് നെല്ലിപ്പുഴയിലെ ഹില്‍വ്യൂ ടവറില്‍ തീപിടിത്തം. സ്ത്രീ ഉള്‍പ്പടെ രണ്ടു പേര്‍ മരിച്ചു. ഇവര്‍ കോട്ടക്കല്‍ സ്വദേശികളാണെന്നാണ് വിവരം. ഇന്ന് പുലര്‍ച്ചെ മൂന്ന് മണിയോടെയാണ് സംഭവം. തീ പടരുന്നത് കണ്ട ഉടന്‍ ജീവനക്കാര്‍ കെട്ടിടത്തിലുണ്ടായിരുന്നവരെ വിവരമറിയിച്ച് പുറത്തെത്തിക്കാനുള്ള ശ്രമം നടത്തിയിരുന്നു. ഒരാളെ ഏറെ ശ്രമപ്പെട്ടാണ് ഫയര്‍ഫോഴ്‌സ് രണ്ടാം നിലയില്‍ നിന്നും ഇറക്കിയത്.

തീ അണച്ചതിനു ശേഷം അഞ്ചരയോടെ ഫയര്‍ഫോഴ്‌സ് ഉദ്യോഗസ്ഥരുടെ തിരച്ചിലിനിടെ മൂന്നു പേരെ കൂടി കണ്ടെത്തി. ഇവരെ ആശുപത്രിയിലെത്തിച്ചു.

ഹില്‍വ്യൂ ടവറിന്റെ അടിഭാഗമാണ് അഗ്‌നിക്കിരയായത്. വട്ടമ്പലം, പെരിന്തല്‍മണ്ണ, കോങ്ങാട് എന്നിവിടങ്ങളില്‍ നിന്നും ഫയര്‍ഫോഴ്‌സ് എത്തിയാണ് തീ അണച്ചത്. ഫയര്‍ഫോഴ്‌സ് എത്താന്‍ ഒരുമണിക്കൂറോളം വൈകിയത് കൂടുതല്‍ നാശനഷ്ടത്തിന് ഇടയാക്കിയതെന്ന ആരോപണവും ശക്തമാണ്.

ഹില്‍വ്യൂ ടവറില്‍ പ്രവര്‍ത്തിക്കുന്ന മസാലി ഹോട്ടലില്‍ നിന്നാണ് തീ പടര്‍ന്നത്. ഷോര്‍ട്ട് സര്‍ക്യൂട്ടാവാം അപകടകാരണമെന്നാണ് പ്രാഥമിക നിഗമനം. നാശനഷ്ടം കണക്കാക്കി വരുന്നതേയുള്ളൂവെന്ന് അധികൃതര്‍ അറിയിച്ചു. പൊലിസ് സ്ഥലത്തെത്തി സ്ഥിതിഗതികള്‍ നിയന്ത്രിച്ചു.

[playlist type="video" ids="972021"]