റോബിന്‍ ബസിനെ ഇന്നും തടഞ്ഞ് മോട്ടോര്‍വാഹന വകുപ്പ്; പ്രതിഷേധിച്ച് നാട്ടുകാര്‍

തിരുവനന്തപുരം: തുടര്‍ച്ചയായ രണ്ടാം ദിവസവും റോബിന്‍ ബസ് തടഞ്ഞ് മോട്ടോര്‍ വാഹനവകുപ്പ്. തൊടുപുഴയിലെത്തുന്നതിന് മുന്‍പ് കോട്ടയം ഇടുക്കി അതിര്‍ത്തിയായ കരിങ്കുന്നത്ത് വച്ചാണ് എം.വി.ഡി ബസ് തടഞ്ഞത്. പെര്‍മിറ്റ് ലംഘനത്തിന് 7500 രൂപ ബസിന് പിഴയിട്ടു. പിന്നീട് നാട്ടുകാരെത്തി പ്രതിഷേധിച്ചതോടെ പത്ത് മിനിറ്റിന് ശേഷം ബസ് വിട്ടയച്ചു.

അതേസമയം, പത്തനംതിട്ട കോയമ്പത്തൂര്‍ റൂട്ടില്‍ റോബിന്‍ ബസ് സര്‍വീസിനെ വെട്ടാന്‍ കെ.എസ്.ആര്‍.ടി.സി ബസ് സര്‍വീസ് തുടങ്ങി. യാത്രക്കാരില്ലാതെ കാലിയായിട്ടാണ് പത്തനംതിട്ടയില്‍ നിന്ന് ബസ് സര്‍വീസ് ആരംഭിച്ചത്. രാവിലെ 4:30ന് പുറപ്പെട്ട ലോഫ്‌ളോര്‍ എസി ബസ് റാന്നി, എരുമേലി, കാഞ്ഞിരപ്പള്ളി, ഈരാറ്റുപേട്ട, തൊടുപുഴ, മൂവാറ്റുപുഴ, പെരുമ്പാവൂര്‍, അങ്കമാലി, തൃശൂര്‍, വടക്കാഞ്ചേരി, പാലക്കാട് വഴിയാണ് കോയമ്പത്തൂരിലേക്ക് സര്‍വീസ് നടത്തുന്നത്. 11.30ന് ബസ് കോയമ്പത്തൂരില്‍ എത്തും.

സര്‍വിസ് ആരംഭിച്ച ബസ് ഇന്നലെ നാലുതവണ എം.വി.ഡി തടഞ്ഞിരുന്നു. ബസ് കസ്റ്റഡിയിലെടുക്കരുതെന്ന ഹൈക്കോടതിയുടെ ഉത്തരവുള്ളതിനാല്‍ പരിശോധന പൂര്‍ത്തിയാക്കി ഉദ്യോഗസ്ഥര്‍ മടങ്ങുകയായിരുന്നു.

പത്തനംതിട്ട സ്വകാര്യ ബസ് സ്റ്റാന്‍ഡില്‍നിന്ന് പുറപ്പെട്ട് 200 മീറ്റര്‍ പിന്നിട്ട ശേഷമാണ് ബസ് ആദ്യംതടഞ്ഞ് പരിശോധന നടത്തിയത്. തുടര്‍ന്ന് പാലാ, അങ്കമാലി, തൃശൂര്‍ പുതുക്കാട് എന്നിവിടങ്ങളിലും മോട്ടോര്‍ വാഹന വകുപ്പ് ബസ് തടഞ്ഞ് പരിശോധന നടത്തി. പത്തനംതിട്ടയില്‍ നടത്തിയ പരിശോധനയില്‍ പെര്‍മിറ്റ് ലംഘനം ആരോപിച്ച് ബസിനു 7,500 രൂപ പിഴയിട്ടു. അതേസമയം, മോട്ടോര്‍ വാഹനവകുപ്പിന്റെ നടപടി തുടരുന്നതിനിടെ റോബിന്‍ ബസ് നാട്ടുകാര്‍ക്കും വാഹനപ്രേമികള്‍ക്കും ഹീറോയായി മാറി.

പാലാ ഇടപ്പാടിയില്‍ മോട്ടോര്‍ വാഹനവകുപ്പ് ബസ് തടഞ്ഞതോടെ നാട്ടുകാര്‍ പ്രതിഷേധവുമായി രംഗത്തെത്തി. അങ്കമാലിയില്‍ ബസ് തടഞ്ഞ ഉദ്യോഗസ്ഥര്‍ക്കു നേരെ നാട്ടുകാര്‍ കൂകിവിളിച്ചു. മോട്ടോര്‍ വാഹനവകുപ്പിന്റെ വഴിനീളെയുള്ള പരിശോധന കാരണം ബസ് കോയമ്പത്തൂരിലെത്താന്‍ വൈകിയിരുന്നു.

ഒക്ടോബര്‍ 16നാണ് പത്തനംതിട്ടയില്‍നിന്ന് കോയമ്പത്തൂരിലേക്ക് പുറപ്പെട്ട ബസ് റാന്നിയില്‍ എം.വി.ഡി ഉദ്യോഗസ്ഥര്‍ പിടിച്ചെടുത്തത്. നീണ്ട നിയമപോരാട്ടത്തിനൊടുവിലാണ് ബസ് കോടതി ഉത്തരവിലൂടെ ഉടമ പുറത്തിറക്കിയത്. പിന്നാലെ വീണ്ടും കോയമ്പത്തൂര്‍ സര്‍വിസ് തുടങ്ങുമെന്ന് പ്രഖ്യാപിച്ച ബസ് ഉടമ, സീറ്റ് ബുക്കിങ്ങും ആരംഭിച്ചിരുന്നു. വെള്ളിയാഴ്ച യാത്ര തുടങ്ങുമെന്നാണ് അറിയിച്ചിരുന്നെങ്കിലും ഇന്നലത്തേക്ക് മാറ്റുകയായിരുന്നു.

അതേസമയം, ഫേസ്ബുക്കില്‍ വെല്ലുവിളിച്ച് പോസ്റ്റിട്ടതിനു പിന്നാലെയാണ് ബസിനെതിരേ നടപടിയെടുത്തതെന്നാണ് ഉദ്യോഗസ്ഥര്‍ പറയുന്നത്. ദേശസാല്‍കൃത പാതയില്‍ സ്റ്റേജ് കാര്യേജ് ബസുകള്‍ സര്‍വിസ് ആരംഭിക്കുന്നതു സംബന്ധിച്ച് കെ.എസ്.ആര്‍.ടി.സി സമര്‍പ്പിച്ച പരാതിയിലായിരുന്നു നടപടി. ഓള്‍ ഇന്ത്യ പെര്‍മിറ്റുള്ള ബസുകള്‍ക്ക് സംസ്ഥാനത്ത് നികുതി അടച്ചാല്‍ ഏതു പാതയിലൂടെയും പെര്‍മിറ്റിലാതെ ഓടാന്‍ അനുമതിയുണ്ടെന്നാണ് സ്വകാര്യ ബസുടമകളുടെ വാദം.

വെള്ളനിറം ബാധകമല്ല. റൂട്ട് ബസുകളെപ്പോലെ യാത്രക്കാരെ കയറ്റുകയും ഇറക്കുകയും ചെയ്യാമെന്നുമാണ് ബസുടമകള്‍ അവകാശപ്പെടുന്നത്. എന്നാല്‍, കേന്ദ്ര വിജ്ഞാപനത്തിന്റെ മറവില്‍ സംസ്ഥാനത്ത് ഓടുന്ന കോണ്‍ട്രാക്ട് കാര്യേജ് ബസുകള്‍ക്കെതിരേ കര്‍ശന നടപടിയെടുക്കുമെന്നായിരുന്നു മോട്ടോര്‍ വാഹന വകുപ്പ് നിലപാട്.