കഠിനംകുളം: പെരുമാതുറ മുതലപ്പൊഴി ഫിഷിങ് ഹാര്‍ബറില്‍ വള്ളം മറിഞ്ഞു മല്‍സ്യത്തൊഴിലാളിയെ കാണാതായ സംഭവത്തെ തുടര്‍ന്ന് റോഡുപരോധവും സംഘര്‍ഷവും. സ്ഥലത്തെത്തിയ എ.ഡി.എം ഉള്‍പ്പെടുന്ന ഉദ്യോഗസ്ഥ സംഘത്തെ ഉപരോധക്കാര്‍ തടഞ്ഞുവച്ചു.
വെള്ളിയാഴ്ച ഉച്ചക്കാണ് മുതലപൊഴി ഹാര്‍ബറില്‌ന വള്ളം മറിഞ്ഞത്. പതിനെട്ടു പേര്‍ സഞ്ചരിച്ചിരുന്ന താങ്ങുവല വള്ളം തിരയില്‍പ്പെട്ട് തലകുത്തനെ മറിഞ്ഞ് കഠിനംകുളം ശാന്തിപുരം നിഷാ കോട്ടേജില്‍ ജോണ്‍സ (48 ) നെ കാണാതാവുകയായിരുന്നു. ബാക്കിയുള്ളവര്‍ രക്ഷാപ്രവര്‍ത്തകരുടെ സഹായത്തോടെ കരയ്‌ക്കെത്തി. സംഭവം നടന്നസമയം മുതല്‍ പ്രദേശത്ത് സംഘര്‍ഷാവസ്ഥയായിരുന്നു. വെള്ളിയാഴ്ച രാത്രി വൈകുവോളം മത്സ്യത്തൊഴിലാളികള്‍ റോഡുപരോധിക്കുകയും ചെയ്തിരുന്നു.
ഇതിന്റെ തുടര്‍ച്ചയെന്ന നിലയില്‍ ഇന്നലെ രാവിലെ ആറു മണിയോടെ മത്സ്യത്തൊഴിലാളികള്‍ ഒറ്റപ്പന, കുന്നോട്, പൂത്തുറ, പെരുമാതുറ മുതലപ്പൊഴി, അഞ്ചുതെങ്ങു ശാന്തിപുരം റോഡുകള്‍ ഉപരോധിച്ചു.തുറമുഖത്തു സ്ഥിരമായി ഉണ്ടാകുന്ന അപകടങ്ങള്‍ കുറക്കുന്നതിനും കാണാതായ മല്‍സ്യത്തൊഴിലാളിയെ കണ്ടെത്താന്‍ നടപടിയെടുക്കണമെന്നുമാവശ്യപ്പെട്ടായിരുന്നു ഉപരോധം.
ഉപരോധം മണിക്കൂറുകള്‍ പിന്നിട്ടതിനെ തുടര്‍ന്നു സ്ഥലത്തെത്തിയ എ.ഡി.എം ജോണ്‍ സാമുവല്‍, ഡപ്യൂട്ടി കലക്ടര്‍ രാജന്‍ സഹായി, തഹസിദാര്‍ ക്ലമന്റ് ലോപ്പസ്, ഹാര്‍ബര്‍ സൂപ്രണ്ടിങ് എന്‍ജിനിയര്‍ കൃഷ്ണന്‍ ബി.ടി.വി എന്നിവരെ ഉപരോധക്കാര്‍ ആദ്യം ശാന്തിപുരത്തും അതുകഴിഞ്ഞു പെരുമാതുറ മുതാലപ്പൊഴിയിലും തടഞ്ഞുവച്ചു. സമരക്കാരുമായി നടന്ന ചര്‍ച്ചയില്‍ ഇന്നുമുതല്‍ കോസ്റ്റ്ഗാര്‍ഡിന്റെ നേതൃത്വത്തില്‍ മല്‍സ്യത്തൊഴിലാളികള്‍ക്ക് സുരക്ഷാ സംവിധാനം ഒരുക്കുമെന്ന് അധികൃതര്‍ വ്യക്തമാക്കി.
പൊഴിമുഖത്തു അടിഞ്ഞുകൂടുന്ന മണല്‍ ട്രഡ്ജിങിലൂടെ മാറ്റുന്നത് മൂന്നാഴ്ചക്കുള്ളില്‍ തുടങ്ങുമെന്നും മല്‍സ്യ തൊഴിലാളികള്‍ക്ക് അടിയന്തിര സാഹചര്യത്തില്‍ ഉപയോഗിക്കുന്നതിനു വേണ്ടിയുള്ള സുരക്ഷാ ഉപകരണങ്ങള്‍ വിതരണം ചെയ്യുന്നതിന് നടപടിയെടുക്കുമെന്നും അധികൃതര്‍ ഉറപ്പു നല്‍കി. തുടര്‍ന്ന് ഉച്ചക്ക് ഒരു മണിയോടെ ഉപരോധം അവസാനിച്ചു.
ഇന്നലെ വൈകിട്ട് അദാനി ഗ്രൂപ്പിന്റെ ട്രഡ്ജിങ് വിദഗ്ധര്‍ മുതലപ്പൊഴിയില്‍ എത്തി പൊഴിമുഖം പരിശോധിച്ചു. ഒരു മാസത്തിനുള്ളില്‍ അദാനി ഗ്രൂപ്പിന്റെ നേതൃത്വത്തില്‍ ട്രഡ്ജിങ് ആരംഭിക്കുമെന്നാണ് ബന്ധപ്പെട്ടവര്‍ പറയുന്നത്.
അതേ സമയം കാണാതായ മല്‍സ്യത്തൊഴിലാളി ജോണ്‍സനു വേണ്ടി മറൈന്‍ എന്‍ഫോഴ്‌സ്‌മെന്റ്, കോസ്റ്റുഗാര്‍ഡ്, വിഴിഞ്ഞത്തു നിന്നും എത്തിയ പരമ്പരാഗത മുങ്ങല്‍ വിദഗ്ദ്ധര്‍ എന്നിവരുടെ നേതൃത്വത്തില്‍ തുടരുകയാണ്.
ആറ്റിങ്ങല്‍ ഡിവൈ. എസ്.പി അജിത്കുമാര്‍, കടയ്ക്കാവൂര്‍ സി.ഐ മുകേഷ്,
കഠിനംകുളം എസ്.ഐ ഹേമന്ത്കുമാര്‍ എന്നിവരടങ്ങുന്ന സംഘം സ്ഥലത്തു ക്യാംപ് ചെയ്യുന്നുണ്ട്.