ശ്രീനഗര്‍: ജമ്മു കശ്മീരിലെ രജൗരിയില്‍ നാല് സൈനികര്‍ക്ക് വീരമൃത്യു. സൈന്യവും ഭീകരരും തമ്മിലുണ്ടായ ഏറ്റുമുട്ടലിലാണ് രണ്ട് ഓഫീസര്‍മാര്‍ക്കും 2 ജവാന്‍മാര്‍ക്കും ജീവന്‍ നഷ്ടമായത്. ഏറ്റുമുട്ടലില്‍ ഒരു സൈനികന് പരുക്കേറ്റു. ഇന്ന് പുലര്‍ച്ചെയാണ് രജൗരിയിലെ കാലെക്കോട്ട മേഖലയില്‍ ഭീകരര്‍ ഒളിച്ചിരിക്കുന്നു എന്ന് വിവരം ലഭിച്ചത്. തുടര്‍ന്ന് സൈന്യം മേഖലയില്‍ തെരച്ചില്‍ നടത്താന്‍ എത്തിയപ്പോള്‍ ഭീകരര്‍ വെടിവെയ്ക്കുകയായിരുന്നു. ഒരു ഭീകരനെയും ഏറ്റുമുട്ടലില്‍ വധിച്ചെന്ന് സൈന്യം പറഞ്ഞു.

ഇന്ന് രാവിലെ 9 മണിയോടെ സോള്‍ക്കിയില്‍ വെച്ചാണ് ഭീകരരുമായി ആദ്യ ഏറ്റുമുട്ടലുണ്ടായത്. തുടര്‍ന്ന് അടിയന്തരമായി പ്രതിരോധം ശക്തമാക്കുകയും തിരച്ചില്‍ ആരംഭിക്കുകയും ചെയ്തു. ഇതിനിടെ രണ്ടു സൈനികര്‍ക്കു നേരെ ഭീകരവാദികള്‍ വെടിയുതിര്‍ക്കുകയായിരുന്നു', ഒരു സൈനിക ഉദ്യോഗസ്ഥന്‍ പറഞ്ഞു. ബുധനാഴ്ച വൈകീട്ട് വരെ ദൗത്യം തുടര്‍ന്നുവെന്നും സൈനികരെ വിന്യസിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു.
പ്രദേശത്തുള്ള പഴയ സംഘത്തില്‍പ്പെട്ട ഭീകരരാണിവര്‍. ഒരു മാസത്തോളമായി സുരക്ഷാസേന ഇവര്‍ക്കായി തിരച്ചില്‍ നടത്തുകയായിരുന്നു. ഭീകരരുടെ പക്കല്‍ വലിയ ആയുധശേഖരമുണ്ടായിരുന്നു.സൈനിക ഉദ്യോഗസ്ഥന്‍ പറഞ്ഞു.

ജമ്മു കശ്മീരില്‍ നാല് സൈനികര്‍ക്ക് വീരമൃത്യു