സൊലാപൂര്‍: സ്ത്രീപുരുഷാനുപാതത്തിലുണ്ടായ വന്‍ കുറവ് ചൂണ്ടിക്കാട്ടി മഹാരാഷ്ട്രയില്‍ അവിവാഹിതരായ പുരുഷന്‍മാരുടെ മാര്‍ച്ച്. മഹാരാഷ്ട്രയിലെ സോലാപൂര്‍ ജില്ലയിലാണ് യുവാക്കള്‍ വധുവിനെ തേടി മാര്‍ച്ച് നടത്തിയത്. ജ്യോതി ക്രാന്തി പരിഷത് എന്ന സംഘടനയാണ് പരിപാടി സംഘടിപ്പിച്ചത്.

ഗര്‍ഭസ്ഥ ശിശുവിന്റെ ലിംഗ നിര്‍ണയത്തിനെതിരെ ശക്തമായ നടപടികള്‍ സ്വീകരിക്കണമെന്ന് ആവശ്യപ്പെട്ട് കലക്ടര്‍ക്ക് നിവേദനം നല്‍കി. മാര്‍ച്ചില്‍ പങ്കെടുത്ത പുരുഷന്‍മാര്‍ക്ക് സര്‍ക്കാര്‍ ഇടപെട്ട് വധുവിനെ കണ്ടെത്തി നല്‍കണമെന്നും നിവേദനത്തില്‍ ആവശ്യപ്പെടുന്നു.

നിരവധി പേര്‍ വിവാഹ വസ്ത്രത്തില്‍ കുതിരപ്പുറത്ത് കയറി ബാന്‍ഡ് വാദ്യങ്ങളുടെ അകമ്പടിയോടെയാണ് കലക്ടറുടെ ഓഫിസില്‍ എത്തി വധുവിനെ ആവശ്യമുണ്ടെന്ന് അറിയിച്ചത്.

പലരും ഈ മാര്‍ച്ചിനെ പരിഹസിച്ചേക്കാം. എന്നാല്‍ യാഥാര്‍ഥ്യമെന്തെന്നാല്‍, വിവാഹപ്രായമെത്തിയ പുരുഷന്‍മാര്‍ക്ക് വധുവില്ല. സംസ്ഥാനത്തെ സ്ത്രീ പുരുഷ അനുപാതത്തിലുള്ള വന്‍ വ്യത്യാസമാണ് ഇതിനു കാരണം മാര്‍ച്ച് സംഘടിപ്പിച്ച ജ്യോതി ക്രാന്തി പരിഷത് സ്ഥാപകന്‍ രമേശ് ഭാസ്‌കര്‍ പറഞ്ഞു. മഹാരാഷ്ട്രയില്‍ 1000 പുരുഷന്‍മാര്‍ക്ക് 889 സ്ത്രീകള്‍ എന്നതാണ് അനുപാതമെന്നും അദ്ദേഹം കൂട്ടിച്ചേര്‍ത്തു.

അനുപാതത്തിലെ ഈ അന്തരം പെണ്‍ഭ്രൂണഹത്യ വര്‍ധിക്കുന്നതുമൂലമാണ്. സര്‍ക്കാറാണ് ഇതിന് ഉത്തരവാദിയെന്നും അദ്ദേഹം ആരോപിച്ചു.