മണ്ണാര്‍ക്കാട്: അമിത വേഗതയില്‍ നിയന്ത്രണം വിട്ട ലോറി സ്വകാര്യ ബസിലിടിച്ച് വിദ്യാര്‍ഥികളടക്കം 25 പേര്‍ക്ക് പരുക്ക്. അലനല്ലൂര്‍ കാരയില്‍ ശനിയാഴ്ച വൈകുന്നേരം അഞ്ചോടെയാണ് അപകടം.
മണ്ണാര്‍ക്കാട് നിന്ന് എടത്തനാട്ടുകരയിലേക്ക് പോവുകയായിരുന്ന സ്വകാര്യ ബസിനെ എതിരേ വന്ന ലോറി ഇടിക്കുകയായിരുന്നു. റോഡില്‍ വശംമാറി വന്ന ലോറി ബസിലിടിച്ചാണ് നിന്നത്. ബസിന്റെയും, ലോറിയുടെയും മുന്‍ ഭാഗം തകര്‍ന്നു.
സ്‌കൂള്‍ വിട്ടു മടങ്ങുകയായിരുന്ന വിദ്യാര്‍ഥികളാണ് അപകടത്തില്‍പ്പെട്ടത്. 25 ല്‍പരം പേര്‍ക്ക് പരുക്കേറ്റിട്ടുണ്ടെന്നാണ് പ്രാഥമിക നിഗമനം. പരുക്കേറ്റവരെ പെരിന്തല്‍മണ്ണയിലെ വിവിധ സ്വകാര്യ ആശുപത്രികളില്‍ പ്രവേശിപ്പിച്ചു.
അപകടത്തെ തുടര്‍ന്ന് സംസ്ഥാന പാതയായ കുമരംപുത്തൂര്‍ - ഒലിപ്പുഴ റോഡ് അരമണിക്കൂറോളം ഗതാഗതം തടസപ്പെട്ടു. നാട്ടുകല്‍ പൊലിസ് കേസെടുത്തു.