വാഹനങ്ങളുടെ ഡിസൈനുകളില്‍ പുത്തന്‍ പരീക്ഷണങ്ങള്‍ നടത്തുകയാണ് വിവിധ വാഹന നിര്‍മ്മാതാക്കള്‍. ഔട്ട് ഓഫ് ദി ബോക്‌സ് ഡിസൈനുകള്‍ക്ക് ഉപഭോക്താക്കള്‍ക്കിടയില്‍ ലഭിക്കുന്ന സ്വീകാര്യതയാണ് ഇത്തരത്തില്‍ പുത്തന്‍ ഡിസൈനുകളുടെ നിര്‍മ്മാണത്തിന് വാഹന ബ്രാന്‍ഡുകളെ പ്രേരിപ്പിക്കുന്നത്. ഇപ്പോള്‍ പരമ്പരാഗത മോഡലുകളെ തകിടം മറിയ്ക്കുന്ന ഒരു ഡിസൈനുമായി രംഗത്തെത്തിയിരിക്കുകയാണ് യമഹ.ഹാന്‍ഡില്‍ബാര്‍ ഇല്ലാത്ത ബൈക്ക് എന്ന ആശയമാണ് കമ്പനി യാഥാര്‍ത്ഥ്യമാക്കാനൊരുങ്ങുന്നത്. മോട്ടോറോയിഡ് 2 എന്ന് പേരിട്ടിരിക്കുന്ന ഡിസൈനില്‍ പുറത്തിറക്കുന്ന ബൈക്കിന് നിരവധി അത്ഭുതകരമായ ഫീച്ചറുകളും കമ്പനി നല്‍കുന്നുണ്ട്.

ട്വിസ്റ്റിംഗ് സ്വിംഗാര്‍, എഐ ഫേഷ്യല്‍ റെക്കഗ്‌നിഷന്‍, സെല്‍ഫ് ബാലന്‍സിങ് തുടങ്ങിയ സാങ്കേതിക വിദ്യകളാണ് ഇതില്‍ ഉപയോഗിച്ചിരിക്കുന്നത്. ഈ ബൈക്ക് സ്വയം സന്തുലിതമാക്കുകയും സ്റ്റാന്‍ഡില്ലാതെ അതിന്റെ സ്ഥാനത്ത് നില്‍ക്കുകയും ചെയ്യുന്നു. കൂടാതെ ഉടമയുടെ മുഖം തിരിച്ചറിഞ്ഞ് പ്രവര്‍ത്തനക്ഷമമാകുന്ന ഫെയ്‌സ് റെക്കഗ്നിഷന്‍ ഫീച്ചറുകള്‍ അടക്കമുള്ളവയും വാഹനത്തിന്റെ സവിശേഷതകളാണ്.
മോട്ടോറോയിഡ് 2 കണ്‍സെപ്റ്റില്‍, പരമ്പരാഗത ഹാന്‍ഡില്‍ബാറിന് പകരം സ്റ്റഡ് ഹാന്‍ഡ്ഗ്രിപ്പുകളാണ് കമ്പനി നല്‍കിയിരിക്കുന്നത്. ഭാവിയിലെ ഡിസൈന്‍ എന്ന രീതിയിലാണ് യമഹ ഈ കോണ്‍സെപ്റ്റ് അവതരിപ്പിച്ചിരിക്കുന്നത്.

ഈ ബൈക്ക് അവതരിപ്പിച്ചുകൊണ്ട് കമ്പനി നല്‍കിയ ഡെമോയില്‍, ഈ ബൈക്ക് റൈഡറില്ലാതെ സ്വതന്ത്രമായി ഓടുകയും മോട്ടോര്‍ സൈക്കിളിന് മുന്നില്‍ നില്‍ക്കുന്ന വനിതാ മോഡലിന്റെ ഭാവങ്ങളെ പിന്തുടര്‍ന്ന് പ്രവര്‍ത്തനം പൂര്‍ത്തിയാക്കുകയും ചെയ്തു. അത് കൊണ്ട് തന്നെ റൈഡറില്ലാതെ തനിയെ സഞ്ചരിക്കാനും ബൈക്കിന് സാധിച്ചേക്കും എന്ന റിപ്പോര്‍ട്ടുകളും പുറത്ത് വരുന്നുണ്ട്.

Content Highlights:YAMAHA MOTOROID 2 IS SETTING A NEW STANDARD