200 ദിവസം തുടര്‍ച്ചയായി കവിതാലാപനം നടത്തി കൊവിഡ് കാലത്ത് ശ്രദ്ധേയനായിരിക്കുകയാണ് നാടന്‍പാട്ട് കലാകാരന്‍ പ്രതീഷ് ആലിപറമ്പ്. കവിതാരചയിതാക്കളെ പ്രോത്സാഹിപ്പിച്ചുകൊണ്ട് അവരുടെ രചനകള്‍ സമൂഹത്തിന് മുന്നില്‍ ആലപിക്കുകയും അവരെ പരിചയപ്പെടുത്തി പ്രോത്സാഹനം നല്‍കുകയാണ് കവിതായജ്ഞത്തിലൂടെ.

കൊവിഡ് ലോക്ക്ഡൗണ്‍ വിതച്ച വിരസതയില്‍ നിന്ന് മുക്തി നേടാനായാണ് അദ്ദേഹം കവിതായജ്ഞത്തിന് തുടക്കം കുറിച്ചത്. നിരവധി കവിതാരചയിതാക്കള്‍ക്ക് അവസരമൊരുക്കുകയാണ് പരിപാടിയിലൂടെ. ഒരു ദിവസം പോലും ഇടവേളകളില്ലാതെ ഫേസ്ബുക്ക് പേജിലൂടെയാണ് കവിതാലാപനം.

പരിപാടിയുടെ ഒന്നാംഘട്ടം 2020 ഏപ്രില്‍ 19 മുതല്‍ ജൂലൈ 28 വരെ നടത്തി.പിന്നീട് കവിതാലാപനത്തിന്റെ രണ്ടാം ഘട്ടം 2020 സെപ്റ്റംബര്‍ 27 മുതല്‍ 2021 ജനുവരി 7 വരെ നടത്തി.കൂടാതെ ജീവകാരുണ്യ മേഖലയിലും നിറസാന്നിധ്യമാണ് പ്രതീഷ്.