ന്യൂഡൽഹി
ബലാത്സംഗം ചെയ്തു കൊലപ്പെടുത്തുന്ന കേസുകളിൽ ഇരയുടെ പ്രായം മാത്രം മാനദണ്ഡമാക്കി വധശിക്ഷ വിധിക്കരുതെന്ന് സുപ്രിംകോടതി. കർണാടകയിൽ അഞ്ചു വയസുകാരിയെ ബലാത്സംഗം ചെയ്തു കൊലപ്പെടുത്തിയ കേസിൽ പ്രതി ഇരപ്പ സിദ്ദപ്പ മുരുഗണ്ണവരുടെ വധശിക്ഷ ജീവപര്യന്തമായി ഇളവു ചെയ്തുകൊണ്ടാണ് ജസ്റ്റിസുമാരായ എൽ. നാഗേശ്വര റാവു, സഞ് ജീവ് ഖന്ന, ബി.ആർ ഗവായ് എന്നിവരടങ്ങിയ ബെഞ്ച് ഈ നിരീക്ഷണം നടത്തിയത്. അഞ്ചുവയസുകാരിയെ പ്രതി ബിസ്ക്കറ്റ് നൽകി പ്രലോഭിപ്പിച്ച് കൊണ്ടുപോയി ബലാത്സംഗം ചെയ്യുകയും കഴുത്തു ഞെരിച്ച് കൊലപ്പെടുത്തി മൃതദേഹം അരുവിയിൽ തള്ളുകയുമായിരുന്നു.
അപൂർവങ്ങളിൽ അപൂർവമായ കേസായതിനാൽ വധശിക്ഷ വേണമെന്നായിരുന്നു പ്രോസിക്യൂഷൻ നിലപാട്. വധശിക്ഷ വിധിച്ച കീഴ്ക്കോടതി അതിനായി പരിഗണിച്ചത് ഇരയുടെ പ്രായം മാത്രമാണെന്ന് ബെഞ്ച് ചൂണ്ടിക്കാട്ടി. പ്രതി ചെയ്ത കുറ്റം ക്രൂരമാണെന്നതിൽ സംശയമില്ല. എന്നാൽ ഇത് അപൂർവങ്ങളിൽ അപൂർവമായ കേസല്ല. സർക്കാർ സമർപ്പിച്ച രേഖകൾ പരിശോധിച്ചാൽ പ്രതിയെ മാറ്റിയെടുക്കാൻ പറ്റില്ലെന്നും സമൂഹത്തിന് ഇപ്പോഴും ഭീഷണിയായി തുടരുന്നുവെന്ന് കരുതാൻ പറ്റില്ലെന്നും കോടതി പറഞ്ഞു.
കുറ്റം ചെയ്യുമ്പോൾ പ്രതിക്ക് 25ൽ താഴെയാണ് പ്രായം. പ്രതിയുടെ അപ്പോഴത്തെ സാമൂഹിക സാഹചര്യങ്ങളും പരിഗണിക്കണം. ഇതിനകം പത്തുവർഷത്തിലധികം പ്രതി ജയിലിൽക്കഴിഞ്ഞതായും കോടതി ചൂണ്ടിക്കാട്ടി. പ്രതി ജയിലിൽ 30 വർഷം പൂർത്തിയാക്കിയതിന് ശേഷം മാത്രമേ ശിക്ഷായിളവോ മറ്റ് ആനുകൂല്യങ്ങളോ നൽകാൻ പാടുളളൂ എന്നും കോടതി വിധിച്ചു.