പാലക്കാട്: ആളിയാര്‍ ഡാം തമിഴ്‌നാട് തുറന്നുവിട്ടതിനെ തുടര്‍ന്ന് പാലക്കാട്ടെ പുഴകളില്‍ ജലനിരപ്പ് ഉയര്‍ന്നു. ചിറ്റൂര്‍ പുഴ നിറഞ്ഞൊഴുകുകയാണ്. യാക്കര പുഴയിലേക്കും കൂടുതല്‍ വെള്ളം എത്തിയിട്ടുണ്ട്.

ഇന്നലെ രാത്രി 11 മണിയോട് കൂടിയാണ് ആളിയാര്‍ ഡാം തുറന്നത്. കേരള ജലവിഭവ വകുപ്പിനെയും പൊലിസിനെയും വിവരം അറിയിച്ചിരുന്നുവെന്നാണ് തമിഴ്‌നാട് അവകാശപ്പെടുന്നത്. സെക്കന്റില്‍ ആറായിരം ക്യൂസെക്‌സ് വെള്ളം തുറന്നുവിടുമെന്ന് ഇന്നലെ തന്നെ ജലവിഭവ വകുപ്പ് ഉദ്യോഗസ്ഥര്‍ക്ക് വിവരം നല്‍കിയെന്നും തമിഴ്‌നാട് അവകാശപ്പെടുന്നു.

വ്യാഴാഴ്ച രാത്രി 10.30 ഓടെ പാലക്കാട്ടെ ജലവിഭവ വകുപ്പ് അധികൃതരേയും 11.30 ഓടെ ജില്ലാ കളക്ടറേയും വിവരം അറിയിച്ചുവെന്നാണ് തമിഴ്‌നാട് പറയുന്നത്.

എന്നാല്‍ ഡാംതുറക്കുന്ന വിവരം പൊതുജനത്തെ അറിയിക്കേണ്ടത് ദുരന്തനിവാരണ അതോറിറ്റിയാണെന്ന് ജലവിഭവവകുപ്പ് പറഞ്ഞു. അതേസമയം, ജലനിരപ്പ് ഉയരുന്നത് സംബന്ധിച്ച് അധികൃതര്‍ മുന്നറിയിപ്പ് നല്‍കാത്തതിനെതിരെ വ്യാപക പ്രതിഷേധം ഉയര്‍ന്നിട്ടുണ്ട്.