സ്വന്തം ലേഖകൻ
കണ്ണൂർ
സംസ്ഥാനത്ത് എച്ച്.ഐ.വി ബാധിതരാകുന്നവരുടെ എണ്ണത്തിൽ ക്രമാനുഗതമായ കുറവ്. രോഗബാധിതരുടെ എണ്ണം വർഷംതോറും കുറഞ്ഞുവരുന്നതായി കഴിഞ്ഞ 16 വർഷങ്ങളിലെ കണക്കുകൾ സൂചിപ്പിക്കുന്നു. 2005 മുതൽ ഈ വർഷം ഒക്ടോബർ വരെയുള്ള കണക്കുകളാണ് ആരോഗ്യവകുപ്പ് പുറത്തുവിട്ടത്.

ഇക്കാലയളവിൽ ഓരോ വർഷവും പരിശോധന വർധിപ്പിച്ചിട്ടും രോഗികളുടെ എണ്ണത്തിൽ കുറവാണ് രേഖപ്പെടുത്തിയത്.
2005ൽ 2,627 ആയിരുന്നു ആകെ രോഗബാധിതർ. ഈ വർഷത്തെ ഒക്ടോബർ വരെയുള്ള കണക്കുകൾ പരിശോധിക്കുമ്പോൾ 691 പേരിലാണ് എച്ച്.ഐ.വി പോസിറ്റിവ് രേഖപ്പെടുത്തിയത്. ഇതിൽതന്നെ സ്ത്രീകളായ രോഗികളുടെ എണ്ണത്തിലും വലിയ കുറവുണ്ട്. 2005ൽ 1476 പുരുഷൻമാർക്കും 1151 സ്ത്രീകൾക്കുമാണ് രോഗം കണ്ടെത്തിയതെങ്കിൽ 2021 ആയപ്പോഴേക്കും ഇത് യഥാക്രമം 478ഉം 209ഉം ആയി കുറഞ്ഞു. പ്രസവസംബന്ധമായ ആവശ്യങ്ങൾ കാരണം പുരുഷൻമാരിലേക്കാൾ ഇരട്ടി സ്ത്രീകളിലാണ് എല്ലാ വർഷവും പരിശോധന നടത്തിയിട്ടുള്ളത്. എന്നിട്ടും പുരുഷൻമാരിലാണ് രോഗം കൂടുതൽ കണ്ടുവരുന്നത്.

2021ൽ 2,40,803 പുരുഷൻമാരിലാണ് പരിശോധന നടത്തിയതെങ്കിൽ ഇക്കാലയളവിൽ 5,67,632 വനിതകളിൽ പരിശോധന നടത്തി.
2019 മുതൽ ഭിന്നലിംഗക്കാർക്കിടയിലും എയ്ഡ്‌സ് കണ്ടെത്തിയിട്ടുണ്ട്. 2019ൽ 4,017 ട്രാൻസ്ജെൻഡേഴ്സിനെ പരിശോധിച്ചതിൽ അഞ്ചുപേർക്കും 2020ൽ 3,681 പേരെ പരിശോധിച്ചപ്പോൾ മൂന്നുപേർക്കും ഈ വർഷം ഇതുവരെ 4,084 പേരെ പരിശോധിച്ചപ്പോൾ നാലുപേർക്കും രോഗം സ്ഥിരീകരിച്ചിട്ടുണ്ട്.