ഒരുങ്ങിയിരുന്നോളൂ ചൊവ്വാ യാത്രക്ക്. യാത്രക്കുള്ള 'പേടകം' ഏതാണ്ട് പണി തീര്‍ന്നുകൊണ്ടിരിക്കുന്നു. നിര്‍മാണം പൂര്‍ത്തീകരിച്ചുകൊണ്ടിരിക്കുന്ന രണ്ട് ഭീമാകാരമായ സ്റ്റാര്‍ഷിപ്പുകളുടെ ചിത്രം പങ്കുവെച്ചിരിക്കുകയാണ് ലോകത്തിലെ ഏറ്റവും വലിയ ധനികരിലൊരാളായ ഇലോണ്‍ മസ്‌ക്. ചന്ദ്രനിലേക്കും ചൊവ്വയിലേക്കും ചരക്കുകളും ആളുകളെയും എത്തിക്കുന്നതിനായി അദ്ദേഹത്തിന്റെ ബഹിരാകാശ കമ്പനിയായ സ്‌പേസ് എക്‌സ് വികസിപ്പിച്ചുകൊണ്ടിരിക്കുന്ന അടുത്ത തലമുറ റോക്കറ്റാണ് സ്റ്റാര്‍ഷിപ്പുകള്‍.

'ഞങ്ങള്‍ ഉടന്‍ തന്നെ ഇവ യാഥാര്‍ത്ഥ്യമാക്കും,' എന്ന് അദ്ദേഹം ചിത്രത്തിന് അടിക്കുറിപ്പും നല്‍കിയിട്ടുണ്ട്. 'ചൊവ്വയിലേക്ക് സ്റ്റാര്‍ഷിപ്പുകള്‍' എന്ന് ട്വീറ്റില്‍ കമന്റായി ചേര്‍ത്തിട്ടുമുണ്ട്. 3.60 ലക്ഷത്തോളം ലൈക്കുകള്‍ ലഭിച്ച ട്വീറ്റിന് താഴെ ആയിരക്കണക്കിന് ആളുകളാണ് കമന്റുകളുമായി എത്തിയിരിക്കുന്നത്. ചിലര്‍ ചൊവ്വയിലേക്കുള്ള ടിക്കറ്റിനും ആവശ്യപ്പെടുന്നുണ്ട്.

സ്‌പേസ്എക്‌സിന്റെ സ്റ്റാര്‍ഷിപ്പ് പേടകം 2030 ന് മുന്‍പ് ചൊവ്വയില്‍ ഇറങ്ങുമെന്ന് ഇലോണ്‍ മസ്‌ക് നേരത്തെ പ്രഖ്യാപിച്ചിരുന്നു. റോക്കറ്റുകള്‍ക്കായി ഫ്‌ലോറിഡയില്‍ ഒരു ലോഞ്ച്പാഡ് നിര്‍മ്മിക്കാനും സ്‌പേസ് എക്‌സ് ആരംഭിച്ചിട്ടുണ്ട്.