തിരുവനന്തപുരം: മുഖ്യമന്ത്രി പിണറായി വിജയനെതിരായ അധിക്ഷേപ പരാമര്‍ശത്തില്‍ മാപ്പ് പറഞ്ഞ് പി.വി. അന്‍വര്‍ എം.എല്‍.എ. നാക്കുപിഴയെന്നും ആത്മാര്‍ഥമായി ക്ഷമ ചോദിക്കുന്നുവെന്നും അന്‍വര്‍ അന്‍വര്‍ ഫേസ്ബുക്ക് വിഡിയോ സന്ദേശത്തില്‍ പറഞ്ഞു.
 
അപ്പന്റെ അപ്പനായാലും മറുപടിയെന്ന് പറഞ്ഞതിന് മാപ്പ് പറയുന്നുവെന്ന് അദ്ദേഹം വീഡിയോയില്‍ വ്യക്തമാക്കി. മുഖ്യമന്ത്രിയുടെ മുകളിലുള്ള ആരായാലും മറുപടി പറയുമെന്നാണ് ഉദ്ദേശിച്ചതെന്നും അന്‍വര്‍ വിശദമാക്കുന്നു. ബുധനാഴ്ച രാവിലെ നിയമസഭ മന്ദിരത്തിനു മുന്നില്‍വെച്ച് മാധ്യമങ്ങളോട് സംസാരിക്കുന്നതിനിടെയായിരുന്നു മുഖ്യമന്ത്രിക്കെതിരെ അന്‍വറിന്റെ പരാമര്‍ശം. 

'മാധ്യമങ്ങളോട് സംസാരിക്കുമ്പോള്‍ നാക്കുപിഴ സംഭവിച്ചു. മുഖ്യമന്ത്രിയോ, മുഖ്യമന്ത്രിയുടെ അപ്പന്റെ അപ്പനായാലോ ഞാന്‍ മറുപടി പറയുമെന്ന ഒരു പരാമര്‍ശം എന്റെ നാവില്‍നിന്ന് വീണുപോയി. ഒരിക്കലും അപ്പന്റെ അപ്പന്‍ എന്ന രീതിയില്‍ അല്ല ഉദ്ദേശിച്ചത്. എന്നെ കള്ളനാക്കി മുഖ്യമന്ത്രി നടത്തിയ പരാമര്‍ശത്തില്‍ മുഖ്യമന്ത്രിക്കു എത്ര മുകളിലുള്ള ആളായാലും പ്രതികരിക്കുമെന്നാണ് ഉദ്ദേശിച്ചത്. വാക്കുകള്‍ അങ്ങനെ ആയിപോയതില്‍ അങ്ങേയറ്റത്തെ ഖേദമുണ്ട്. മുഖ്യമന്ത്രിയോടും കുടുംബത്തോടും എല്ലാവരോടും മാപ്പു പറയുന്നു, ഖേദം പ്രകടിപ്പിക്കുന്നു, ആത്മാര്‍ഥമായ ക്ഷമ ചോദിക്കുകയാണ്' അന്‍വര്‍ വിഡിയോയില്‍ പറയുന്നു. അന്‍വര്‍ വ്യക്തമാക്കുന്നു. 

ഇടതുപക്ഷവുമായുള്ള ബന്ധം ഉപേക്ഷിച്ചശേഷം അന്‍വര്‍ എ.എല്‍.എ ആദ്യമായാണ് നിയമസഭയില്‍ എത്തിയത്. കഴുത്തില്‍ ഡി.എം.കെയുടെ ഷാളണിഞ്ഞ്, കൈയില്‍ ചുവന്ന തോര്‍ത്തുമായാണ് അന്‍വര്‍ എത്തിയത്. പ്രതിപക്ഷത്തോട് ചേര്‍ന്ന് നാലാം നിരയില്‍ ലീഗ് എം.എല്‍.എ എ.കെ.എം. അഷ്‌റഫിനോട് ചേര്‍ന്നാണ് അന്‍വറിന്റെ ഇരിപ്പിടം. അതേസമയം മുഖ്യമന്ത്രി ബുധനാഴ്ചയും നിയമസഭയിലെത്തില്ല. പനി ആയതിനാല്‍ ഡോക്ടര്‍മാര്‍ വിശ്രമം നിര്‍ദേശിച്ചുവെന്ന് മുഖ്യമന്ത്രിയുടെ ഓഫിസ് അറിയിച്ചു.

https://www.facebook.com/reel/1269786234474341