കണ്ണൂർ
പ്രഗത്ഭരും കഴിവുറ്റവരുമായ വിദ്യാർഥികളെ പ്രോത്സാഹിപ്പിക്കാൻ ദത്തെടുക്കൽ പദ്ധതി(സ്റ്റുഡന്റ് അഡോപ്ഷൻ സ്‌കീം)യുമായി കണ്ണൂർ സർവകലാശാല. പാഠ്യേതര വിഷയങ്ങളിലെ കഴിവുകൾ തുടർന്നുകൊണ്ടുപോകുന്നതിന് ഉന്നതവിദ്യാഭ്യാസം തടസമാകാത്തവിധം പ്രോത്സാഹനം നൽകുകയാണ് പദ്ധതിയുടെ ലക്ഷ്യം. ഒപ്പം പാർശ്വവൽകൃത വിഭാഗങ്ങളിലെ വിദ്യാർഥികൾക്ക് പഠന സഹായമൊരുക്കാനും പദ്ധതി സഹായകമാകും.

തെരഞ്ഞെടുക്കപ്പെടുന്ന വിദ്യാർഥികൾക്ക് അവരുടെ താൽപര്യത്തിന് അനുസരിച്ച കോഴ്‌സുകളിൽ പ്രവേശനം അനുവദിക്കും. ട്യൂഷൻ, പരീക്ഷാ ഫീസുകൾ ഒഴിവാക്കി നൽകുന്നതിനൊപ്പം, പരിശീലനത്തിനടക്കം അവശ്യമായ ധനസഹായവും ലഭ്യമാക്കും. പരിശീലനം, മത്സരങ്ങൾ തുടങ്ങിയവയ്ക്കായി നഷ്ടമാകുന്ന ഹാജർ കാര്യത്തിലും പ്രത്യേക ഇളവ് നൽകും. അതത് മേഖലയിലെ പ്രവർത്തനവുമായി ബന്ധപ്പെട്ട ആവശ്യങ്ങൾ കാരണം പരീക്ഷാ സമയത്ത് ഹാജരാകാനായില്ലെങ്കിൽ പ്രത്യേകം പരീക്ഷ നടത്താനും സൗകര്യം ഒരുക്കും.
കായികം, സാംസ്‌കാരികം, യോഗ്യത, ഭിന്നശേഷി അഥവാ ആദിവാസി എന്നിങ്ങനെ നാല് വിഭാഗങ്ങളിലായാണ് പദ്ധതി നടപ്പാക്കുക.

യോഗ്യരായ അപേക്ഷകരിൽനിന്ന് സ്‌ക്രീനിങ് കമ്മിറ്റി അർഹരായ വിദ്യാർഥികളെ കണ്ടെത്തും. 2021- 22 അധ്യയന വർഷം മുതൽ നടപ്പാക്കുന്ന പദ്ധതിയിൽ ആദ്യമായി തെരഞ്ഞെടുക്കപ്പെട്ടത് അന്തർദേശീയ ബാഡ്മിന്റൺ താരം ട്രീസാ ജോളിയാണ്.