തിരുവനന്തപുരം: പോത്തന്‍കോട് സുധീഷ് വധക്കേസില്‍ പ്രതിയെ തിരഞ്ഞ് പോയ പൊലിസ് സംഘത്തിന്റെ വള്ളം മുങ്ങി പൊലിസുകാരന്‍ മരിച്ചു. ആലപ്പുഴ സ്വദേശിയും എസ്.എ.പി ക്യാംപിലെ പൊലിസുകാരനുമായ ബാലുവാണ് മരിച്ചത്. വള്ളത്തിലുണ്ടായിരുന്ന സി.ഐയേയും മറ്റൊരു പൊലിസുകാരനെയും രക്ഷപ്പെടുത്തി കരയ്‌ക്കെത്തിച്ചു.

അഞ്ചുതെങ്ങ് പണയില്‍ക്കടവിലാണ് സംഭവം.പോത്തന്‍കോട് കൊലക്കേസിലെ പ്രധാനപ്രതി ഒട്ടകം രാജേഷിനെ തിരഞ്ഞ് പോയ പൊലിസ് സംഘമാണ് വള്ളം മുങ്ങി അപകടത്തില്‍പ്പെട്ടത്. ഒട്ടകം രാജേഷ് അഞ്ചുതെങ്ങ് മേഖലയിലെ ഒരു തുരുത്തില്‍ ഒളിവില്‍ കഴിയുന്നതായി വിവരം ലഭിച്ചതിന്റെ അടിസ്ഥാനത്തിലാണ് ഇവര്‍ അങ്ങോട്ട് പോയത്. എന്നാല്‍ ഇവര്‍ യാത്ര ചെയ്തിരുന്ന വള്ളം കായലില്‍ മുങ്ങിപ്പോവുകയായിരുന്നു.