മണ്ണഞ്ചേരി: സ്‌കൂട്ടറില്‍ പോകുകയായിരുന്ന എസ്. ഡി.പി.ഐ നേതാവിനെ കാറിടിപ്പിച്ച് തെറിപ്പിച്ച ശേഷം വെട്ടി പരുക്കേല്‍പിച്ചു. എസ്. ഡി.പി. ഐ സംസ്ഥാന സെക്രട്ടറി പൊന്നാട് അല്‍ഷാ ഹൗസില്‍ അഡ്വ.കെ.എസ്. ഷാന്‍ (38) നാണ് വെട്ടേറ്റത്. ഏഴരയോടെ മണ്ണഞ്ചേരി കുപ്പേഴം ജങ്ഷനിലായിരുന്നു സംഭവം.

വീട്ടിലേക്ക് സ്‌കൂട്ടറില്‍ പോകുകയായിരുന്ന ഷാന്റെ പിന്നില്‍ കാര്‍ ഇടിപ്പിക്കുകയും റോഡില്‍ വീണ ഇയാളെ കാറില്‍ നിന്നിറങ്ങിയ നാലോളം പേര്‍ വെട്ടുകയുമായിരുന്നു. നാട്ടുകാരാണ് ആശുപത്രിയില്‍ എത്തിച്ചത്.അടുത്ത വീട്ടിലെ സി.സി ടിവി യില്‍ ദൃശ്യങ്ങള്‍ പതിഞ്ഞിട്ടുണ്ട്. കൈ കാലുകള്‍ക്കും വയറിനും തലക്കും വെട്ടേറ്റിട്ടുണ്ട്.

ആലപ്പുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ആലപ്പുഴ ഡി.വൈ. എസ്.പി എം.ജയരാജിന്റെ നേതൃത്വത്തില്‍ വന്‍ പൊലീസ് സംഘം പ്രദേശത്ത് ക്യാമ്പ് ചെയ്യുന്നുണ്ട്.