കാക്കനാട്: വിദ്യാര്‍ത്ഥികളെയും യുവാക്കളെയും ലക്ഷ്യമിട്ട് നഗരത്തിലെത്തിച്ച മയക്കുമരുന്നുമായി യുവാക്കളെ പിടികൂടി. കണ്ണൂര്‍ ശ്രീകണ്ടപുരം കോട്ടൂര്‍ സ്വദേശി മുഹമദ് ഫഹിം (25), ശ്രീകണ്ടപുരം സ്വദേശി ഷബീര്‍ (39), കണ്ണൂര്‍ തളിപ്പറമ്പ് സ്വദേശി നവാസ് (31), കോട്ടയം വടവത്തൂര്‍ സ്വദേശി അലന്‍ (24), കണ്ണൂര്‍ ചെറുകുന്ന് സ്വദേശി ഇര്‍ഷാദ് (22) എന്നിവരെയാണ് കൊച്ചി സിറ്റി ഡാന്‍സാഫ് സംഘവും തൃക്കാക്കര പൊലീസും ചേര്‍ന്ന് നടത്തിയ സംയുക്ത പരിശോധനയില്‍ വലയിലാക്കിയത്.

തൃക്കാക്കരയിലുള്ള ഹെവന്‍ ഗാര്‍ഡന്‍ ഹോട്ടലില്‍ പിടികൂടുമ്പോള്‍ 24.78 ഗ്രാം എം.ഡി.എം.എ, 4.67 ഗ്രാം എക്സ്റ്റസി തുടങ്ങിയ രാസ ലഹരികളും 7.99 ഗ്രാം കഞ്ചാവും ഇവരുടെ കൈവശം ഉണ്ടായിരുന്നു. ഓയോ റൂമുകള്‍ കേന്ദ്രീകരിച്ചായിരുന്നു മയക്കുമരുന്ന് വ്യാപാരം നടത്തിയിരുന്നതെന്ന് അധികൃതര്‍ പറഞ്ഞു.

കൊച്ചി സിറ്റി പോലീസ് കമ്മീഷണര്‍ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നാര്‍ക്കോട്ടിക്ക് അസ്സിസ്റ്റന്റ് കമ്മീഷണറുടെ നിര്‍ദ്ദേശപ്രകാരം ഡാന്‍സാഫ് സബ് ഇന്‍സ്‌പെക്ടറുടെ നേതൃത്വത്തില്‍ ഇവരെ നിരീക്ഷിച്ചു വരുകയായിരുന്നു. കൂടുതല്‍ പ്രതികള്‍ ഇതില്‍ ഉള്‍പ്പെട്ടിട്ടുണ്ടോയെന്ന് അന്വേഷിച്ചു വരികയാണെന്നും പൊലീസ് വ്യക്തമാക്കി.