കണ്ണൂര്‍: ഇന്റര്‍നാഷനല്‍ എയര്‍പോര്‍ട്ടില്‍ നിന്ന് കൂടുതല്‍ രാജ്യാന്തര സര്‍വീസുകളുമായി എയര്‍ ഇന്ത്യ എക്‌സ്പ്രസ്. യു.എ.ഇയിലെ റാസല്‍ഖൈമ എയര്‍പോര്‍ട്ടിലേക്ക് ഇന്ന് മുതലാണ് പുതിയ സര്‍വീസ് തുടങ്ങിയത്. തുടക്കത്തില്‍ ഒരാഴ്ചയില്‍ മൂന്ന് സര്‍വീസുകളാണ്. ചൊവ്വ, ബുധന്‍, വെള്ളി ദിവസങ്ങളില്‍. റാസല്‍ഖൈമയിലേക്കുള്ള ആദ്യ വിമാന സര്‍വീസിലെ യാത്രക്കാരിയെ കിയാല്‍ മാനേജിങ് ഡയറക്ടര്‍ ദിനേശ് കുമാര്‍ ബോര്‍ഡിങ് പാസ് നല്‍കി സ്വീകരിച്ചു. വിമാന കമ്പനി അധികൃതരും കിയാല്‍ അധികൃതരും ചേര്‍ന്ന് യാത്രകാര്‍ക്ക് മധുരം നല്‍കി യാത്രാ മംഗളങ്ങള്‍ നേര്‍ന്നു.

റാസല്‍ഖൈമയിലേക്കുള്ള കണക്ടിവി വടക്കന്‍ മലബാര്‍ മേഖലയിലെ പ്രവാസികള്‍ക്ക് വലിയ ആശ്വാസമാണ് നല്‍കുന്നത്. ആദ്യ വിമാനത്തില്‍ 186 യാത്രക്കാരുണ്ടായിരുന്നു. സൗദി അറേബ്യയിലെ ദമ്മാം എയര്‍പോര്‍ട്ടിലേക്കും എയര്‍ ഇന്ത്യ എക്‌സ്പ്രസ് പുതുതായി കണ്ണൂരില്‍ നിന്ന് സര്‍വീസ് നടത്തുന്നുണ്ട്. വ്യാഴം, വെള്ളി, ശനി ദിവസങ്ങളിലായി ആഴ്ചയില്‍ മൂന്ന് സര്‍വീസുകളാണുള്ളത്.  കൂടാതെ അബൂദബിയിലേക്കും മസ്‌കത്തിലേക്കും സര്‍വീസുകള്‍ കൂട്ടിയിട്ടുണ്ട്.

ഏറ്റവും ആധുനികവും പുതിയതുമായ ബോയിങ് 737 മാക്‌സ് വിമാനങ്ങളാണ് എയര്‍ ഇന്ത്യ എക്‌സ്പ്രസ് പുതിയ സര്‍വീസുകള്‍ക്കായി ഉപയോഗിക്കുന്നത്. കിയാലുമായി ഉണ്ടാക്കിയ കരാര്‍ പ്രകാരം കൂടുതല്‍ എയര്‍പോര്‍ട്ടുകളിലേക്ക് കണ്ണൂരില്‍ നിന്ന് സര്‍വീസ് തുടങ്ങാനും എയര്‍ ഇന്ത്യക്ക് പദ്ധതിയുണ്ട്.