വാഷിങ്ടണ്‍: അമേരിക്കയുടെ മുന്നറിയിപ്പിനെ വകവയ്ക്കാതെ റഫയില്‍ ആക്രമണം നടത്തിയ ഇസ്‌റാഈലിന് ആയുധം നല്‍കുന്നത് യു.എസ് തടഞ്ഞാല്‍ ഇസ്‌റാഈല്‍ പ്രതിരോധത്തിലാകും. ഇസ്‌റാഈലിന് ഏറ്റവും കൂടുതല്‍ ആയുധം നല്‍കുന്ന രാജ്യമാണ് യു.എസ്. 65.6 ശതമാനം ആയുധവും വെടിക്കോപ്പുകളും ഇസ്‌റാഈലിന് നല്‍കുന്നത് അമേരിക്കയാണ്. അമേരിക്ക കഴിഞ്ഞാല്‍ ഇസ്‌റാഈലുമായി ആയുധ വ്യാപാരം നടത്തുന്ന രാജ്യമാണ് ജര്‍മനി. 29.7 ശതമാനം ആയുധങ്ങള്‍ നല്‍കുന്നത് ജര്‍മനിയാണ്. ഇറ്റലി 4.7 ശതമാനം ആയുധങ്ങള്‍ നല്‍കുന്നുണ്ട്.

ഗസ്സയിലെ ആക്രമണത്തോടെ ഇറ്റലിയില്‍ ഇസ്‌റാഈലുമായുള്ള ആയുധ കരാര്‍ റദ്ദാക്കണമെന്ന പൊതുവികാരം ശക്തമാണ്. ഇതുമായി ബന്ധപ്പെട്ട് പ്രക്ഷോഭങ്ങളും നടന്നിരുന്നു.

2019 നും 2013 നും ഇടയില്‍ 69 ശതമാനം ആയുധങ്ങളാണ് ഇസ്‌റാഈല്‍ യു.എസില്‍ നിന്ന് ഇറക്കുമതി ചെയ്തതെന്നാണ് സ്‌റ്റോക്‌ഹോം ഇന്റര്‍നാഷനല്‍ പീസ് റിസര്‍ച്ച് ഇന്‍സ്റ്റിറ്റ്യൂട്ട് കണക്ക് പറയുന്നു. യു.എസില്‍ നിന്ന് 380 കോടി ഡോളറിന്റെ സൈനിക സഹായവും ഇസ്‌റാഈല്‍ പ്രതിവര്‍ഷം സ്വീകരിക്കുന്നുണ്ട്. കഴിഞ്ഞ ദിവസം ഇസ്‌റാഈലിലേക്ക് അയക്കാനുള്ള ആയുധങ്ങളും ബോംബുകളും യു.എസ് വൈകിപ്പിക്കുന്നതായി വാര്‍ത്ത പുറത്തുവന്നിരുന്നു. ഇതിനിടെയാണ് റഫ ആക്രമിച്ചാല്‍ ആയുധം നല്‍കില്ലെന്ന് ബൈഡന്‍ ആവര്‍ത്തിച്ചത്.