ഗാസയില്‍ ഇസ്‌റാഈല്‍ നടത്തുന്ന അതിക്രമങ്ങള്‍ കൊണ്ടും അവരുടെ ലക്ഷ്യങ്ങള്‍ ഫലം കാണാത്ത സാഹചര്യത്തില്‍, കൂടുതല്‍ പേരെ കൊന്നിട്ടായാലും യുദ്ധം അവസാനിപ്പിക്കാനുള്ള മാര്‍ഗങ്ങള്‍ തേടണമെന്ന് നിര്‍ദേശിക്കുകയാണ് അമേരിക്കന്‍ സെനറ്റര്‍ ലിന്‍ഡ്‌സെ ഗ്രഹാം. രണ്ടാം ലോക മഹായുദ്ധ കാലത്ത് ജപ്പാനില്‍ നിക്ഷേപിച്ചത് പോലെ അണുബോംബ് വര്‍ഷിക്കണമെന്നാണ് ഗ്രഹാമിന്റെ നിര്‍ദേശം. ഫലസ്തീനില്‍ ഇസ്‌റാഈലിന് സാധ്യമായതെല്ലാം ചെയ്യണമെന്നും എന്‍.ബി.സിക്ക് നല്‍കിയ അഭിമുഖത്തില്‍ ഗ്രഹാം പറഞ്ഞു. 

അമേരിക്കയിലെ പേള്‍ ഹാര്‍ബറിനെ ശത്രുക്കള്‍ ആക്രമിച്ചു. ഇതിന് മറുപടിയായിട്ട് ജര്‍മ്മനിയോടും ജപ്പാനോടും യുദ്ധം ചെയ്തപ്പോള്‍ ആണവായുധങ്ങള്‍ ഉപയോഗിച്ച് അത് അവസാനിപ്പിക്കാന്‍ നമ്മള്‍ തീരുമാനിച്ചു. അതായിരുന്നു ശരിയായ തീരുമാനമെന്നും ​ഗ്രഹാം കൂട്ടിച്ചേര്‍ത്തു
ഗ്രഹാമിന്റെ പ്രസ്താവനക്കെതിരെ ഹമാസ് രംഗത്തുവന്നു. അമേരിക്കന്‍ സെനറ്ററുടെ പരാമര്‍ശം ഞെട്ടിപ്പിക്കുന്നതാണ്. അദ്ദേഹത്തിന്റെ ധാര്‍മ്മിക അധഃപതനത്തിന്റെ ആഴവും വംശഹത്യയുടെയും കൊളോണിയലിസത്തിന്റെയും മാനസികാവസ്ഥയുമാണ് ഇത് സൂചിപ്പിക്കുന്നത്.

തീര്‍ത്തും ഒറ്റപ്പെട്ട് കഴിയുന്ന സാധാരണക്കാരായ ജനങ്ങള്‍ക്കെതിരെ ഇസ്റാഈൽ സൈന്യം നടത്തുന്ന വംശഹത്യക്ക് കൂട്ടുനില്‍ക്കുകയാണ് അമേരിക്ക. അവിടത്തെ രാഷ്ട്രീയ വരേണ്യവര്‍ഗത്തിനിടയിലും ഈ മാനസികാവസ്ഥയുണ്ടെന്ന് തെളിയിക്കുന്നതാണ് ഇത്തരം പ്രസ്താവനയെന്നും ഹമാസ് വ്യക്തമാക്കി.