കോഴിക്കോട്: കേരള ബ്ലാസ്റ്റേഴ്‌സിനെ ഇനി സ്വീഡിഷ് കോച്ച് മികായേല്‍ സ്റ്റാറെ പരിശീലിപ്പിക്കും. 2026 വരെയാണ് കരാര്‍. 48കാരനായ സ്റ്റാറെയുമായി ക്ലബ് രണ്ടുവര്‍ഷത്തെ കരാറില്‍ ഒപ്പു വെച്ചതായാണ് സൂചന. ഇവാന്‍ വുകോമനോവിച്ച് സ്ഥാനമൊഴിഞ്ഞ ഒഴിവിലേക്കാണ് സ്റ്റാറെ എത്തുന്നത്.

രണ്ട് ദശകത്തിലേറെ പരിശീലന പരിചയുണ്ട് സ്റ്റാറേക്ക്. തായ്‌ലന്‍ഡ് ക്ലബായ ഉതായ് താനിയില്‍നിന്നാണ് സ്റ്റാറെ കൊച്ചിയിലേക്കെത്തുന്നത്. 2007ല്‍ സ്വീഡിഷ് ക്ലബായ വാസ്ബി യുനൈറ്റഡിലാണ് പരിശീലകനായി തുടക്കമിട്ടത്. സ്വീഡിഷ് ക്ലബുകളായ എ.ഐ.കെ, ഐ.എഫ്.കെ ഗോഥേബോര്‍ഗ്, ഹാക്കന്‍ എന്നിവയുടെ കോച്ചായിരുന്നു. ഗ്രീക്ക് ക്ലബായ പനിയോനിയോസ്, ചൈനീസ് ക്ലബായ ഡാലിയന്‍ യിഫാങ്, അമേരിക്കന്‍ പ്രൊഫഷനല്‍ സോക്കര്‍ ക്ലബായ സാന്‍ ജോസ് എര്‍ത്ത്ക്വാക്ക്, നോര്‍വീജിയന്‍ ക്ലബായ സാര്‍സ്‌ബോര്‍ഗ് എന്നിവയുടെയും പരിശീലകനായി പ്രവര്‍ത്തിച്ചിട്ടുണ്ട്.

കപ്പ് മത്സരങ്ങളായ സ്വെന്‍സ്‌ക കപ്പന്‍, സൂപ്പര്‍കുപെന്‍ എന്നിവ അദ്ദേഹത്തിന്റെ കരിയറിലെ സുപ്രധാന നേട്ടങ്ങളാണ്. പ്രീസീസണിന്റെ തുടക്കത്തില്‍ തന്നെ ടീമിനൊപ്പം ചേരുമെന്നാണ് റിപ്പോര്‍ട്ട്.