കൊല്‍ക്കത്ത: സന്ദേശ്ഖാലി സംഭവം ബി.ജെ.പി തിരക്കഥയാണെന്ന് ആരോപിച്ച് വനിത നേതാവ് പാര്‍ട്ടി വിട്ട് തൃണമൂല്‍ കോണ്‍ഗ്രസില്‍ ചേര്‍ന്നു.  സൈറ പര്‍വീണാണ് ബി.ജെ.പിയില്‍ നിന്ന് രാജി വെച്ചത്. സന്ദേശ്ഖാലി സംഭവം ബി.ജെ.പി തിരക്കഥയാണെന്ന് വാര്‍ത്താസമ്മേളനത്തില്‍ അവര്‍ തുറന്നടിച്ചു.

'സന്ദേശ്ഖാലി സംഭവത്തില്‍ ഇരയായ സ്ത്രീക്കൊപ്പം നില്‍ക്കാനാണ് ശ്രമിച്ചത്. സത്യത്തിന് വേണ്ടിയായിരുന്നു എന്റെ പോരാട്ടം. പിന്നീടാണ് ഇതെല്ലാം ബി.ജെ.പി തിരക്കഥയാണെന്ന് എനിക്ക് മനസിലായത്. മൊബൈല്‍, മീഡിയ, പണം എല്ലാം ഇതിനുവേണ്ടി അവര്‍ ഉപയോഗിച്ചു. എല്ലാത്തിനും നിര്‍ദേശങ്ങള്‍ നല്‍കിയത് ബി.ജെ.പി നേതാക്കളാണ്' പര്‍വീണ്‍ ആരോപിച്ചു.

ബി.ജെ.പിയുടെ പോരാട്ടം തൃണമൂല്‍ കോണ്‍ഗ്രസിന് എതിരെയാണ്. പക്ഷേ തൃണമൂല്‍ കോണ്‍ഗ്രസ് നേതാക്കളേയും പ്രവര്‍ത്തകരേയും കൂടുതല്‍ അറിഞ്ഞപ്പോള്‍ അവര്‍ തെറ്റ് ചെയ്യില്ലെന്ന് മനസിലായി. അതോടെ താന്‍ തൃണമൂലിനൊപ്പം പോകാന്‍ തീരുമാനിക്കുകയായിരുന്നെന്നും പര്‍വീണ്‍ കൂട്ടിച്ചേര്‍ത്തു. സന്ദേശ്ഖാലിയിലെ പല തെളിവുകളും ബി.ജെ.പി വ്യാജമായി സൃഷ്ടിച്ചതാണെന്നും അവര്‍ കൂട്ടിച്ചേര്‍ത്തു. സന്ദേശ്ഖാലിയിലെ സ്ത്രീകളെ സ്വാധീനിക്കുന്നതിനുള്ള നിര്‍ദ്ദേശങ്ങള്‍ നല്‍കാന്‍ ബി.ജെ.പി നേതാക്കള്‍ വേറെ തന്നെ ഫോണും സിം കാര്‍ഡുമാണ് ഉപയോഗിക്കുന്നതെന്നും അവര്‍ വ്യക്തമാക്കി. 

സന്ദേശ്ഖാലിയില്‍ തൃണമൂല്‍ കോണ്‍ഗ്രസ് നേതാവ് ഷാജഹാന്‍ ഷെയ്ഖും അനുയായികളും ഭൂമി തട്ടിപ്പും ലൈംഗികാതിക്രമവും നടത്തിയെന്നാണ് പരാതി. പിന്നീട് കേസുമായി ബന്ധപ്പെട്ട് ഷാജഹാന്‍ ഷെയ്ഖിനെ പൊലിസ് അറസ്റ്റ് ചെയ്യുകയും ചെയ്തു. അതേസമയം, സന്ദേശ്ഖാലി സംഭവം ബി.ജെ.പി തിരക്കഥയാണ് നേതാവ് തന്നെ പറയുന്ന വിഡിയോയും പുറത്ത് വന്നിരുന്നു.