ദുബൈ: പൊണ്ണത്തടിയുമായി പലപ്പോഴും ബന്ധപ്പെട്ടിരിക്കുന്ന തരത്തിലുള്ള അര്‍ബുദം ആഗോളതലത്തേക്കാള്‍ യു.എ.ഇയില്‍ വളരെ സാധാരണയാണെന്ന് ഗവേഷണത്തില്‍ കണ്ടെത്തല്‍. ആഗോള ശരാശരിയുമായി താരതമ്യപ്പെടുത്തുമ്പോള്‍ അന്നനാളത്തിലെ അര്‍ബുദം രാജ്യത്ത് മൂന്നിരട്ടി ആഘാതം സൃഷ്ടിക്കുന്നുണ്ട്. അതേസമയം വന്‍കുടല്‍/മലാശയ അര്‍ബുദം, കരള്‍ അര്‍ബുദം എന്നിവയും കൂടുതലായുണ്ട്. 

ഗള്‍ഫിലെ അമിതവണ്ണത്തെ ചെറുക്കുന്നതില്‍ ശ്രദ്ധ കേന്ദ്രീകരിക്കുന്നത് അമിതഭാരവുമായി ബന്ധപ്പെട്ട അര്‍ബുദങ്ങളുടെ ഭാരം കുറയ്ക്കുമെന്ന് ജേണല്‍ ഓഫ് എപ്പിഡെമിയോളജി ആന്‍ഡ് ഗ്ലോബല്‍ ഹെല്‍ത്തില്‍ പ്രസിദ്ധീകരിച്ച ഗവേഷണത്തിന്റെ രചയിതാക്കള്‍ പറഞ്ഞു.
ശരീരഭാരം കുറയ്ക്കാനും ശാരീരിക പ്രവര്‍ത്തനങ്ങള്‍ പ്രോത്സാഹിപ്പിക്കാനും ലക്ഷ്യമിട്ടുള്ള തന്ത്രങ്ങള്‍ രോഗങ്ങളുടെ ആഘാതം ഗണ്യമായി കുറയ്ക്കുമെന്ന് ജിദ്ദ കിങ് അബ്ദുല്ല ഇന്റര്‍നാഷനല്‍ മെഡിക്കല്‍ റിസര്‍ച്ച് സെന്ററിലെ ഡോ. റബ്ബ് ബജുനൈദ് പറഞ്ഞു. 

വിവിധ അര്‍ബുദങ്ങളുടെ ഫലമായി വൈകല്യമോ അസുഖമോ മരണമോ മൂലം നഷ്ടപ്പെട്ട ആരോഗ്യകരമായ ജീവിതത്തിന്റെ എണ്ണം അദ്ദേഹം പരിശോധിച്ചു. ജനസംഖ്യയുടെ പ്രായഘടനയ്ക്കായി പ്രായ നിലവാരമുള്ള, വൈകല്യം അഡ്ജസ്റ്റ് ചെയ്ത ജീവിത വര്‍ഷങ്ങളുടെ നിരക്ക് നല്‍കുന്നതിന് ക്രമീകരിച്ചു. 

യു.എ.ഇയിലെ അന്നനാള അര്‍ബുദത്തിന്റെ എ.എസ്.ഡി.ആര്‍ ഓരോ 100,000 ആളുകള്‍ക്കും 85.07 ആണെന്ന് പഠനം റിപ്പോര്‍ട്ട് ചെയ്തു. വന്‍കുടല്‍/മലാശയ അര്‍ബുദത്തിന് ഓരോ 100,000 പേര്‍ക്കും 66.18 ആണ്. ആഗോളതലത്തില്‍ ഓരോ 100,000 പേര്‍ക്കും 24.40 എന്ന ശരാശരി നിരക്കിന്റെ ഇരട്ടിയിലധികമാണിത്. പൊണ്ണത്തടിയുമായി ബന്ധപ്പെട്ടിരിക്കുന്ന മറ്റൊരു അര്‍ബുദമായ കരള്‍ കാന്‍സര്‍ യു.എ.ഇയിലെ ഓരോ 100,000 പേര്‍ക്കും 35.49 എന്ന എ.എസ്.ഡി.ആര്‍ ഉണ്ട്. ഇത് ഓരോ 100,000 പേര്‍ക്കും 19.24 എന്ന ആഗോള ശരാശരിയുടെ ഇരട്ടിയോളം വരും. 

മറ്റ് ഗള്‍ഫ് രാജ്യങ്ങളിലും അമിതവണ്ണവുമായി ബന്ധപ്പെട്ട അര്‍ബുദത്തിന്റെ ഉയര്‍ന്ന നിരക്ക് കണ്ടെത്തി. പാശ്ചാത്യവല്‍ക്കരണത്തിന്റെ സ്വാധീനത്തില്‍ ജി.സി.സി രാജ്യങ്ങളില്‍ പൊണ്ണത്തടി വര്‍ധിക്കുന്നതാണ് ഈ വര്‍ധനയ്ക്ക് കാരണമെന്നു ഡോ. റബ്ബ് ബജുനൈദ് വ്യക്തമാക്കി.