ദോഹ: ഖത്തറില്‍ നിന്നു യുദ്ധ വിമാനങ്ങള്‍ വാങ്ങാന്‍ ഇന്ത്യ ഒരുങ്ങുന്നു. 12 മിറാഷ് 2000 യുദ്ധ വിമാനങ്ങള്‍ വാങ്ങാനുള്ള ചര്‍ച്ചകള്‍ പുരോഗമിക്കുകയാണ്. ഖത്തറിന്റെ കൈവശമുള്ള 12 സെക്കന്റ് ഹാന്‍ഡ് മിറാഷ് 2000 യുദ്ധവിമാനങ്ങളാണ് ഇന്ത്യക്ക് കൈമാറുന്നതിനു വേണ്ടിയുള്ള ചര്‍ച്ച പുരോഗമിക്കുന്നത്.

 ഇതിനായി ഖത്തറില്‍ നിന്ന് ഒരു സംഘം ഇന്ത്യയിലെത്തിയതായി ദേശീയ മാധ്യമങ്ങള്‍ റിപോര്‍ട്ട് ചെയ്യുന്നു. നിലവിലെ വിമാനങ്ങളുടെ സ്ഥിതിയെ സംബന്ധിച്ച് സംഘം ഇന്ത്യന്‍ ഉദ്യോഗസ്ഥര്‍ക്ക് വിശദീകരിച്ചു കൊടുത്തു. 12 വിമാനങ്ങള്‍ക്ക് 5000 കോടിയോളം രൂപയാണ് ഖത്തര്‍ ആവശ്യപ്പെടുന്ന തുക. വിലയുടെ കാര്യത്തില്‍ ഇതുവരെയും ധാരണയായിട്ടില്ല.

ഖത്തറില്‍ നിന്നുള്ള വിമാനങ്ങള്‍ വാങ്ങുന്നതോടെ ഇന്ത്യയുടെ കൈവശമുള്ള വിമാനങ്ങളും ഒരേ ശ്രേണിയില്‍ വരുന്നതിനാല്‍ പരിപാലനവും ഇന്ത്യക്ക് എളുപ്പമായിരിക്കും. വ്യാപാരമേഖലകളില്‍ പ്രധാന പങ്കാളിയായ ഖത്തര്‍ 11 ബില്യണ്‍ ഡോളറിന്റെ വ്യാപാരമാണ് കഴിഞ്ഞ വര്‍ഷങ്ങളില്‍ രാജ്യങ്ങള്‍ തമ്മില്‍ നടന്നത്. ദ്രവീകൃത പ്രകൃതി വാതകമേഖലയില്‍ കഴിഞ്ഞ മാസങ്ങളില്‍ ഇന്ത്യയും ഖത്തറും കരാറില്‍ ഒപ്പുവച്ചിരുന്നു.