ബെര്‍ലിന്‍: യൂറോകപ്പ് സെമി ലൈനപ്പായി. ആദ്യ സെമിയില്‍ സ്‌പെയിന്‍ ഫ്രാന്‍സിനെ നേരിടും. ഇംഗ്ലണ്ടും നെതര്‍ഡലന്‍ഡ്‌സും തമ്മിലാണ് അടുത്ത പോരാട്ടം. 

ആവേശപ്പോരില്‍ തുര്‍ക്കിയെ ഒന്നിനെതിരെ രണ്ട് ഗോളിന് വീഴ്ത്തി നെതര്‍ലന്‍ഡ്‌സ്. അവസാന മിനിറ്റുകളിലാണ് തുര്‍ക്കിയുടെ പ്രതിരോധത്തെ പൊളിച്ച് ഓറഞ്ച് പട വിജയതീരമണഞ്ഞത്. സമാത് അയാക്ദിന്‍ നേടിയ ഏക ഗോളില്‍ ആദ്യ പകുതിയില്‍ മുന്നിലെത്തിയ തുര്‍ക്കിയെ സ്റ്റെഫാന്‍ ഡെ വ്രിജിന്റെ ഗോളിലും മള്‍ഡറുടെ സെല്‍ഫ് ഗോളിലുമാണ് ഡച്ചുകാര്‍ മറികടന്നത്. മത്സരത്തിലുടനീളം ഇരു ടീമുകളും മികച്ച മുന്നേറ്റങ്ങള്‍ നടത്തി. സെമിയില്‍ ഇംഗ്ലണ്ടാണ് നെതര്‍ലന്‍ഡ്‌സിന്റെ എതിരാളികള്‍. 

സ്വിറ്റ്‌സര്‍ലന്‍ഡിനെ തോല്‍പിച്ചാണ് ഇംഗ്ലണ്ട് സെമിയിലെത്തിയത്. ക്വാര്‍ട്ടറില്‍ ഇംഗ്ലണ്ടിന് കടുത്ത് വെല്ലുവിളിയാണ് സ്വിസ് സംഘം ഉയര്‍ത്തിയത്. നിശ്ചിത സമയത്തും അധിക സമയത്തും ഇരുടീമുകളും ഓരോ ഗോള്‍ വീതമടിച്ച് സമനിലയില്‍ പിരിഞ്ഞു ഇതോടെ മത്സരം ഷൂട്ടൗട്ടിലേക്ക് നീണ്ടു. സ്വിസ് സംഘത്തിനായി ആദ്യ കിക്കെടുത്ത മാനുവല്‍ അക്കാഞ്ചിയുടെ കിക്ക് തടുത്ത് ജോര്‍ഡന്‍ പിക്‌ഫോര്‍ഡ് ഇംഗ്ലണ്ടിന്റെ രക്ഷകനായി. അതേസമയം ഇംഗ്ലണ്ടിനായി കിക്കെടുത്ത മുഴുവന്‍ പേരും ലക്ഷ്യം കാണുകയും ചെയ്തു.