തിരുവനന്തപുരം: മഴയില്‍ നനയാതെ വെയിലില്‍ പൊള്ളാതെ മഞ്ഞില്‍ തണുക്കാതെ ഒന്ന് തലചായ്ക്കാന്‍ ഇഴജന്തുക്കളേയും ജീവജാലങ്ങളേയും പേടിക്കാതെ തനിക്കും അമ്മക്കും സ്വസ്ഥമായി ഉറങ്ങാന്‍ അടച്ചുറപ്പുള്ളൊരു കൂര. അതിലപ്പുറം കിനാക്കളൊന്നുമില്ലായിരുന്നു മാരായമുട്ടം സ്വദേശി ജോയിക്ക്. അതിലേക്ക് ഇത്തിരി ഇത്തിരിയായി സ്വരൂപിക്കുന്ന കൂട്ടിവെപ്പിലേക്ക് ചേര്‍ത്തു വെക്കാന്‍ വെറുമൊരു 1500 രൂപക്കു വേണ്ടിയാണ് മനുഷ്യ വിസര്‍ജ്ജ്യങ്ങള്‍ വരെ നിറഞ്ഞ ആ മാലിന്യത്തോട്ടിലേക്ക് ജോയി ഇറങ്ങിയത്. 1500 എന്നത് അയാളെ സംമബന്ധിച്ചത്തോളം തന്റെ കിനാക്കളിലേക്കുള്ള വലിയൊരു സംഖ്യ ആയിരുന്നിരിക്കണം.

ജീവിക്കാനായി പലപല ജോലികള്‍ ചെയ്തിട്ടുണ്ട് ആ ചെറുപ്പക്കാരന്‍.  ആദ്യം മണല്‍വാരലായിരുന്നു. സര്‍ക്കാര്‍ മണല്‍ വാരല്‍ നിരോധിച്ചതോടെ ആക്രി പെറുക്കാന്‍ പോയി. ആക്രി പെറുക്കുന്നതില്‍ നിന്ന് വലിയ വരുമാനമൊന്നും കിട്ടാറില്ലായിരുന്നു. അങ്ങിനെയിക്കെയാണ് സുഹൃത്ത് വഴി റെയില്‍വേ സ്റ്റേഷനില്‍ മാലിന്യം നീക്കാനുള്ള അവസരം കിട്ടിയത്. 

എത്ര വയ്യെങ്കിലും ജോലിക്കു പോകുന്ന ആളായിരുന്നു ജോയി- അമ്മ പറയുന്നു. എന്തു ജോലിയും ചെയ്യും. അവനായിരുന്നു ഏക ആശ്രയം. രാവിലെ ആറു മണിക്ക് ജോലിക്കിറങ്ങും. വൈകീട്ട്  തിരിച്ചെത്തും. ഒരിക്കലും അവന്‍ വീട്ടില്‍ വെറുതെ ഇരിക്കാറില്ല. എന്തു ജോലിക്ക് വിളിച്ചാലും പോകും.'അമ്മ പറയുന്നു.

അമ്മ മാത്രമാണ് ജോയിക്കുള്ളത്. വീടെന്ന് പറയാന്‍ പറ്റാത്ത ഒരു ഒറ്റമുറി കൂരയില്‍. എന്നെങ്കിലുമൊരിക്കല്‍ നമുക്കും അടച്ചുറപ്പുള്ള വീട് നിര്‍മിക്കാന്‍ സാധിക്കുമെന്ന് പറയാറുണ്ടായിരുന്നു ജോയി അമ്മ മെല്‍ഹിയോട്. 10 വര്‍ഷംമുമ്പാണ് ജോയിയുടെ പിതാവ് നേശമണി മരിച്ചത്. അന്നുമുതല്‍ അമ്മയും മകനും മാത്രമാണ്. വീടിനു ചുറ്റും കാടുപിടിച്ചു കിടക്കുകയാണ്. ഇവിടേക്കുള്ള വഴിയും സഞ്ചാരയോഗ്യമല്ല. സഹോദരങ്ങള്‍ മറ്റിടങ്ങളില്‍ താമസിക്കുന്നു. ജോയിയുടെ സഹോദര ഭാര്യ അര്‍ബുദം ബാധിച്ച് മരിച്ചിട്ട് ഒരുമാസമായിട്ടേ ഉള്ളൂ. ഇപ്പോള്‍ ആ വീട്ടില്‍ കാത്തിരിപ്പിലാണ് മെല്‍ഹി. തന്റെ മകന്‍ തിരിച്ചുവരുന്നതും കാത്ത്.